Jak ciapier vyhladaje były minski aŭtavakzał «Uschodni» FOTY

Aŭtavakzał «Uschodni» raźmiaščaŭsia pa adrasie vulica Vaniejeva, 34. Ciapier na jaho miescy idzie hrandyjoznaja budoŭla. Vydańnie Blizko.by pahladzieła, jak prasoŭvajucca raboty, i daviedałasia, što budzie ŭ budynku kolišniaha vakzała.

Choładna, ale praca kipić

Uzimku budaŭniki aktyŭna pracujuć nad rekanstrukcyjaj aŭtavakzała «Uschodni», niahledziačy na chałodnaje nadvorje. Na placoŭcy kipić praca: idzie demantaž starych kanstrukcyj, padrychtavany padmurak i staviacca novyja inžyniernyja sistemy. Taksama na budoŭli bačnaja śpiecyjalizavanaja technika.

Hienpadradčyk — BU-94 budtresta №1. Budaŭniki ŭžo zaviaršyli demantaž staroha dachu i padłoh, a taksama demantažnyja raboty ŭ padvalnaj častcy, pracujuć jany i pa ŭzmacnieńni plit pieronaŭ.

Taksama ciapier idzie praca nad pierapłaniroŭkaj budynka i robiacca novyja cahlanyja pieraharodki i ścieny. Pa kontury pieronaŭ ŭžo zalityja padmurki i padpornyja ścieny vyšynioj 2,5 mietra pad ŭstanoŭku vitražoŭ budučych łabaratoryj.

Prajekt raspracavany UP «Minskprajekt», zakazčyk — UKB Minharvykankama. Raboty, pavodle danych pašparta abjekta, pavinny zaviaršycca ŭ studzieni 2026 hoda.

U budynku byłoha vakzała budzie raźmiaščacca haradski centr techničnaj tvorčaści dla dziaciej i moładzi. Ułady abiacajuć, što centr stanie sapraŭdy hrandyjoznym prajektam. Jon budzie ŭjaŭlać saboj inavacyjnuju adukacyjnuju placoŭku, aryjentavanuju na technałohii, inžynieryju i matematyku, i stanie stymułam dla junych vynachodnikaŭ i daśledčykaŭ.

U ramkach Centra buduć arhanizavanyja navučalnyja łabaratoryi pa roznych kirunkach: avija– i rakietamadelavańnie, aŭta– i motamadelavańnie, robatatechnika, radyjoelektronika i miechatronika, 3D-madelavańnie, stvareńnie radyjokiravanych aŭtamabilaŭ, sudnamadelavańnie, praca ź bieśpiłotnikami, trasavy madelizm, a taksama architektura i dyzajn.

Akramia taho, płanujecca adkryć dziciačy IT-centr, dzie moładź zmoža vyvučać prahramavańnie i ličbavyja technałohii.

Dla praktyčnaha prymianieńnia atrymanych viedaŭ u centry buduć stvoranyja śpiecyjalnyja trasy i placoŭki dla vyprabavańniaŭ madelaŭ. Naprykład, mabilny karkasny basiejn dazvolić pravodzić ekśpierymienty z vodnymi madelami, a śpiecyjalna abstalavanyja trasy stanuć idealnym miescam dla testavańnia radyjokiravanych aŭtamabilaŭ i dronaŭ.

Kamientary da artykuła