Biełaruska prapanavała zabirać na vajskovyja zbory tolki niežanatych mužčyn
Prapanova vyklikała haračuju dyskusiju.
Błohierka Dzijana Skuliniec raspaviała, što paviestka jaje mužu pryjšła niečakana.
«My, kaniečnie, čuli pra zbory, ale nie dumali, što heta zakranie nas: u nas piacimiesiačnaje dzicia. Ja ŭ šoku, muž u šoku, my ŭ šoku», — padzialiłasia ŭ tyktoku maładaja maci.
Dzijana paskardziłasia, što nie razumieje, jak u takoj situacyi davać rady adnoj. Jana ličyć niespraviadlivym, što adterminoŭka ad armii jość tolki dla tych, u kaho troje dziaciej, a siemji z hrudničkami nie ličacca, chacia im niaprosta.
«Ja navat nie mahu adna pamyć dzicia, ja jaho nie ŭtrymaju — jano ŭ nas vielmi toŭścieńkaje, aktyŭnaje».
Dzijana z mužam i synam adrazu paśla rodaŭ. Fota: @diana_sposob
Na pohlad dziaŭčyny, idealna było b zabirać na zbory chałaściakoŭ.
«Ja nie razumieju, niaŭžo nie chapaje chałaściakoŭ. Navošta zabirać baćkoŭ u małaletnich, hrudnych dziaciej?»
Videa nabrała amal 600 tysiač prahladaŭ i vyklikała haračuju dyskusiju. Niekatoryja kamientatary padtrymali dziaŭčynu, paspačuvaŭšy joj u novych abstavinach, a niechta nie zrazumieŭ — maŭlaŭ, jość siemji ŭ kudy bolš składanych situacyjach.
«U nas čaćviora dziaciej, i muž pajšoŭ na zbory», «U ludziej dvojni, i taksama iduć na zbory», «Navat i z tryma dziećmi zabirajuć — muž byŭ 50 dzion na zborach», — dzialilisia svaim bolem inšyja biełaruski.
Niechta pryhadaŭ dośvied žonak dalnabojščykaŭ ci tych, chto pracuje vachtavym mietadam, — im taksama niaprosta. Asobna vykazvalisia žančyny z Ukrainy, jakija praz vajnu nie bačać svaich mužčyn užo pa niekalki hadoŭ.
«Jon nie tolki muž i baćka, najpierš jon — hramadzianin Respubliki Biełaruś», «A chto radzimu budzie abaraniać, čamu moładź ciapier takaja biezdapamožnaja?» — padklučylisia patryjoty.
«U mianie tak muža (žanicha jašče) zabrali na miesiac na zbory za dva miesiacy da viasiella, tamu chałaściakoŭ, viedajecie, taksama takoje sabie — chaj zabirajuć tych, chto kosić ad armii», — prapanavała jašče adna biełaruska.
Paśla chvali parad Dzijana zapisała jašče niekalki videa, dzie jana adkazvaje chiejtaram i prosić ich supakoicca.
Dzijana z mužam. Fota: @diana_sposob
Pra start čarhovaj pravierki bojehatoŭnaści ŭ Minabaronie zajavili jašče ŭ pačatku lutaha. Pa słovach Viktara Chrenina, mierapryjemstva pačałosia «praz asablivaści aktualnych abstavin, adnak jano nosić płanavy charaktar».
«Abstaviny abaviazvajuć nas trymać ruku na pulsie i trymać porach suchim, być hatovymi da taho, dla čaho pryznačanyja ŭzbrojenyja siły, pry patrebie — zabiaśpiečyć abaronu suvierenitetu i terytaryjalnaj cełaści Respubliki Biełaruś», — cytavała tady jaho słovy pres-słužba.
Čytajcie taksama:
«Maja pamyłka, što zapisvaju videa». Čym skončylisia rezanansnyja zvaroty da Łukašenki?
Prostaja žančyna ź vioski na Minščynie źbiraje svaimi tancami miljony prahladaŭ u tyktoku