Amierykanca, jaki atrymaŭ palityčny prytułak u Biełarusi, vydalili sa śpisu vyšuku FBR
Fiederalnaje biuro rasśledavańniaŭ ZŠA bolš nie razhladaje Evana Ńjumana (Evan Neumann), udzielnika šturmu Kapitolija, jak asobu ŭ vyšuku. Staronka ź infarmacyjaj pra jaho vyšuk źnikła z sajta viedamstva, piša Reform.news.
Skrynšot videa BT
Jašče ŭčora na sajcie FBR Ńjuman znachodziŭsia ŭ śpisie vyšuku, ale ŭ dzień inaŭhuracyi novy prezident ZŠA Donald Tramp svaim ukazam pamiłavaŭ udzielnikaŭ šturmu Kapitolija 6 studzienia 2021 hoda. Ciapier Evan Ńjuman moža viarnucca na radzimu.
Ńjuman braŭ udzieł u biesparadkach u Vašynhtonie ŭ studzieni 2021 hoda. Praź miesiac jon uciok za miažu i ŭ vyniku znajšoŭ prytułak u Biełarusi, dzie atrymaŭ palityčny status. Jon pasialiŭsia ŭ Breście, spačatku zarablaŭ na žyćcio ŭrokami anhlijskaj movy, a potym adkryŭ nievialiki restaran z amierykanskaj kuchniaj.
Biełaruskaja prapahanda vykarystoŭvała jaho jak instrumient krytyki ZŠA. Pryčym u roznych intervju Ńjuman nieadnarazova vykazvaŭ nadzieju na pamiłavańnie i žadańnie viarnucca dadomu da svajoj siamji.