Samy zahadkavy vizit. Łukašenka nie prajaśniŭ, pra što damaŭlaŭsia z Pucinym na Vałaamie

Takoj zakrytaj sustrečy pamiž Pucinym i Łukašenkam jašče nie było: trochdzionnyja pieramovy na vostravie Vałaam prajšli amal u poŭnym infarmacyjnym vakuumie, adznačajuć ekśpierty. Prapahandysty paabiacali padrabiaznaści ad Łukašenki. Siońnia jon pravioŭ admysłovuju naradu pa mižnarodnych pytańniach, dzie, jak anansavała jaho pres-słužba, i pavinien byŭ raspavieści pra vyniki pierahavoraŭ z Pucinym.

Łukašenka z Pucinym na Vałaamie, 26 lipienia 2024 hoda. Fota: presavaja słužba prezidenta Rasii

Ale Łukašenka abyšoŭsia staranna padabranymi ahulnymi słovami. Jon raspavioŭ, što z Uładzimiram Pucinym znajšoŭ parazumieńnie «pa ŭsich pytańniach». «Nieprymańnia absalutna niama», — skazaŭ jon. 

Łukašenka dadaŭ, što «ŭsie pytańni pavinny być vyrašanyja da pačatku čaćviortaha kvartała», nie raskryvajučy hetyja pytańni.

@nashaniva Pres-słužba Łukašenki apublikavała svoj varyjant jahonaha fota z Pucinym #Łukašienko #łukašienkoprikoły #biełaruś #biełorusy #aleksandrłukašienko #minsk #biełaruśnovosti ♬ Cleaning - Owen Wang

«Z prezidentam Rasii my damovilisia, što da hetaha momantu pavinny być zakryty ŭsie prablemnyja pytańni — i pa linii saŭbiezaŭ (ab harantyjach biaśpieki), i pa temach urada, — skazaŭ biez udakładnieńniaŭ Łukašenka. 

Ale jon adznačyŭ, što ŭ paradku dnia pieramoŭ centralnaje miesca zajmali pytańni biaśpieki.

«Jany zakryty charaktar ​​mieli. Usie siłavyja struktury i ministry padklučanyja, Ministerstva zamiežnych spraŭ — pa peŭnych pytańniach. Voś sutnaść hetych pieramovaŭ. Ja jašče raz padkreślivaju: parazumieńnie znojdziena pa ŭsich pytańniach, nieprymańnia nijakaha niama», — skazaŭ jon. 

Adzinaje, što prahučała bolš kankretna, heta toje, što Łukašenka abmiarkoŭvaŭ na sustrečy z Pucinym novuju formułu cenaŭtvareńnia na naftu, utylizacyjny zbor i pieradapłatu za naftu. 

Nakont pieradapłaty Pucin, sa słoŭ Łukašenki, navat aburyŭsia.

«Hetaha być nie moža! Jakaja pieradapłata? Usio žyćcio pracavali bieź pieradapłaty — zmožam i dalej pracavać», — pieradaŭ Łukašenka słovy Pucina.

Kamientary da artykuła