106-hadovy amierykaniec viarnuŭ sabie tytuł samaha pažyłoha parašutysta ŭ śviecie
Alfred «Ał» Błaškie, jaki naradziŭsia 4 studzienia 1917 hoda, aficyjna viarnuŭ sabie status čałavieka, jaki skoknuŭ z parašutam u samym stałym uzroście. Pra heta paviedamlaje Kniha rekordaŭ Hinesa.
Alfred Błaškie ź instruktaram. Fota: guinnessworldrecords.com
Na momant skačka Ału było 106 hadoŭ 327 dzion, što bolš čym na try hady pieravyšaje papiaredni rekord. Upieršyniu jon pabiŭ rekord u 2020 hodzie, va ŭzroście 103 hadoŭ, kali vyskačyŭ z samalota, jaki ruchaŭsia na vyšyni 4200 mietraŭ, kab adśviatkavać vypuskny svaich unukaŭ-bliźniat.
«Heta była maja mara. Ja nikoli nie dumaŭ, što pražyvu tak doŭha», — skazaŭ tady jon.
Toj skačok byŭ dla jaho druhim — pieršy adbyŭsia za try hady da taho, na stohadovy jubilej.
Ciapier ža Alfred vyrašyŭ zrabić svoj treci i, jak śćviardžaje, apošni skačok z parašutam paśla taho, jak u 2022 hodzie jahony rekord pabiła šviedka Rut Łarsan, jakaja pražyła 103 hady 259 dzion.
Da doŭhažychara dałučyŭsia hubiernatar Techasa Hreh Ebat, jaki pahadziŭsia skoknuć z parašutam razam ź im jašče tady, kali jany sustrelisia paśla taho, jak piensijanier upieršyniu pabiŭ rekord. Adnak z-za niepahadzi i prablem z raskładam skačok adkładali čatyry razy.
Alfred Błaškie i Hreh Ebat u palocie. Fota: guinnessworldrecords.com
Adnak ža ranicaj 27 listapada 2023 hoda Alfred Błaškie i hubiernatar Hreh Ebat sabralisia i padnialisia na bort samalota. Ich padniali na vyšyniu 2,7 km, dzie jany dałučylisia da svaich daśviedčanych instruktaraŭ i skoknuli z samalota ŭ svabodnaje padzieńnie. Źnizu za skačkom nazirali ŭsie dzieci i ŭnuki Alfreda, a taksama pradstaŭniki ŚMI i členy amierykanskaha ŭrada.
Asnoŭny parašut rekardsmiena adkryŭsia na vyšyni 1,6 km, paśla čaho jon spuściŭsia da miesca biaśpiečnaha pryziamleńnia razam sa svaim instruktaram. Addychaŭšysia, jon pacisnuŭ ruku hubiernataru Ebatu i pavinšavaŭ jaho ź pieršym u jahonym žyćci skačkom z parašutam.
Paśla taho mužčyna skazaŭ prysutnym žurnalistam:
«Kali vy dumajecie, što nie možacie, vy prosta niedaaceńvajecie siabie. Kožny čałaviek zdolny na bolšaje, čym jon dumaje. Jamu prosta treba pryniać rašeńnie pasprabavać».
Čytajcie taksama:
«Tam, naviersie, było cudoŭna». 104-hadovaja žančyna skoknuła z parašutam z vyšyni 4000 mietraŭ
Pamierła 104-hadovaja žančyna, što na minułym tydni skoknuła z parašutam z vyšyni 4000 mietraŭ
Turkmienski futbolny kłub pabiŭ rekord Knihi Hinesa, ale taja čamuści hetaha nie pryznaje