Kancert Dyjany Arbieninaj znoŭ admianili. Choć jana ŭžo śpieła z žonkaj mabilizavanaha na vajnu
Kancert Dyjany Arbieninaj u Tomsku admianili praz skarhi na «niekarektnyja vykazvańni śpiavački pa biahučaj situacyi».
Pra admienu kancerta raspaviała sama Arbienina ŭ telehram-kanale.
«Biez tłumačeńnia pryčyn kancert u Tomsku byŭ admienieny, i dahavor skasavany ŭ adnabakovym paradku. Ja asabista prynošu ščyryja prabačeńni ŭsioj našaj publicy za padmanutyja nadziei; za vydatkavanyja hrošy; za skradzienyja siły. Ja čakała hety kancert nie mienš čym vy», — napisała śpiavačka.
Čynoŭnica pa kultury ŭ Tomskaj vobłaści Alena Šahava paviedamiła «Interfaksu», što kancert byŭ admienieny paśla taho, jak stali pastupać «zvaroty ad nasielnictva sa skarhami na, jak śćviardžałasia, niekarektnyja vykazvańni śpiavački pa biahučaj situacyi».
Spačatku čynoŭniki na skarhi adkazvali, što śpiavačka biez prablem vystupała ŭ inšych haradach i navat śpiavała pieśni z «žonkaj udzielnika SVA», ale patok zvarotaŭ nie spyniŭsia.
22 kastryčnika padčas vystupu ŭ Novasibirsku Dyjana Arbienina zaprasiła na scenu žonku vajskoŭca, jaki braŭ udzieł u rasiejskim uvarvańni va Ukrainu, i razam ź joj vykanała pieśniu «Siekundu nazad».
U 2014 hodzie ŭradženka Biełarusi Arbienina zajaŭlała, što nie padtrymlivaje dałučeńnie Kryma da Rasii.
U lutym 2022 hoda jana vypuściła pieśniu «Nie maŭčy» sa słovami: «Ty idzieš na čužuju vajnu, i nichto ŭ nas nie spytaŭ».
Paśla 24 lutaha 2022 hoda kancerty Dyjany Arbieninaj admianiali ŭ niekalkich haradach Rasii.
Čytajcie taksama: