U akcyi ŭ Minsku, pryśviečanaj Dniu pravoŭ čałavieka, uziali ŭdzieł šeść čałaviek
Akcyja ŭ centry Minska, pryśviečanaja Mižnarodnamu dniu pravoŭ čałavieka, prajšła biez zatrymańniaŭ.
10 śniežnia prykładna ŭ 18.00 šeść čałaviek vystrailisia na Kastryčnickaj płoščy kala znaka nulavoha kiłamietra. Jany trymali płakaty «My nie bydła, u nas jość pravy» i «Pravy jość tam, dzie za ich zmahajucca». Praz chvilinu da prysutnych padyšoŭ supracoŭnik milicyi ŭ formie i praź miehafon niekalki razoŭ papiaredziŭ, što ich dziejańni niezakonnyja i mohuć paciahnuć za saboj adkaznaść. Adnak maładyja ludzi na papiaredžańni nie reahavali.
Prastajaŭšy z płakatami prykładna 15 chvilin, jany razyšlisia.
Padčas akcyi nichto zatrymany nie byŭ. Za jaje chodam nazirali ludzi ŭ cyvilnym, zdymali akcyju na videakamieru, adnak nie ŭmiešvalisia.
Akcyja była arhanizavana maładziožnaj strukturaj Abjadnanaj hramadzianskaj partyi «Maładyja demakraty».