«Vahnier» moža pryjści ŭ Biełaruś jašče i ŭ vyhladzie kampjutarnaha virusa

Dniami źjaviŭsia novy virus, jaki nazyvajecca Wagner i jaki aktyŭna raspaŭsiudžvajecca pa sietcy. Aryjentavany jon na ruskamoŭnuju aŭdytoryju i šyfruje fajły na kampjutarach z Windows. Paśla hetaha jon prapanuje zapisvacca ŭ PVK «Vahnier» i «zmahacca z Šajhu». Raspaviadajem, jak jon pracuje i jak abaranicca.

Płakat «Dałučajsia da PVK «Vahnier» u Pieciarburhu, 24 červienia 2023 hoda. Fota: Associated Press

Pra virus paviedamiła kampanija Cyble, jakaja analizuje kibierpahrozy. Virus pracuje tak:

1. Vy spampoŭvajecie prahramu, jakaja jaho ŭtrymlivaje, i adkryvajecie jaje.
2. Virus skanuje aktyŭnyja pracesy, kab nie zapuskałasia niekalki adzinak virusa adnačasova.
3. Dalej jon pavyšaje svaje pravy, zapisvajecca ŭ aŭtazahruzku Windows i pačynaje šyfravać fajły, a taksama stvaraje svaje kopii na ŭsich dyskach kampjutara, uklučajučy fłeški.
4. Paśla šyfravańnia jon mianiaje zastaŭku na łahatyp PVK «Vahnier» i adkryvaje tekstavy fajł, dzie napisana na ruskaj movie, što heta «aficyjny virus PVK «Vahnier» pa pracaŭładkavańni» (daśledčyki ličać, što virus nakiravany na ruskamoŭnuju prastoru, tamu biełarusy taksama pad pahrozaj).

Dalejšy tekst fajła taki:

«Braty, chopić ciarpieć ułady! Idziom na vajnu suprać Šajhu! (numary telefonaŭ)… kali vy chočacie pajści suprać čynoŭnikaŭ! Pryvitańnie ad Pryhožyna!»

Taki typ virusaŭ nazyvajecca «vajpiery». Heta značyć, što ŭ vas niama anijakaj mahčymaści rasšyfravać fajły i pra ich možna paprostu zabycca. Voś jakija papki jon šyfruje:

• Links,
• Contacts,
• Downloads,
• OneDrive,
• Saved Games,
• Favorites,
• Searches,
• Videos,
• C:\Users\Username\AppData\Roaming,
• C:\Users\Public\Documents,
• C:\Users\Public\Pictures,
• C:\Users\Public\Music,
• C:\Users\Public\Videos,
• C:\Users\Public\Desktop.

U vypadku, kali vy stali jahonaj achviaraj, to možacie zhubić ładnuju častku vašych dakumientaŭ i zroblenaj pracy.

Jak abaranicca ad takich virusaŭ?

Voś što rajać ekśpierty Cyble, jakija i adkryli virus:

• Nie zahružajcie pirackich prahram z sumnieŭnych sajtaŭ (naprykład, pa pieršych vynikach z pošukavikaŭ). Časta mienavita tam chavajucca virusy.
• Pierš, čym spampavać niešta, pierakanajciesia, što krynica nadziejnaja, a sajt sapraŭdny.
• Rabicie reziervovyja kopii infarmacyi. Zachoŭvajcie ich nie na kampjutary, a na fłešcy abo ŭ vobłaku, da jakoha vaš kampjutar nie maje pastajannaha dostupu.
• Svaječasova abnaŭlajcie prahramy na kampjutary i apieracyjnuju sistemu (nie adklučajcie taksama antyvirus. — «NN»). Karystajciesia VPN.
• Pierš, čym zrabić pieravod u kryptavalucie, pierapraviercie adras, na jaki vy jaho dasyłajecie, niekalki razoŭ — mnohija virusy zamianiajuć ich u bufiery abmiena (to-bok kali vy skapirujecie adras i ŭstavicie, to jon moža zamianicca). Zachoŭvajcie Seed-frazy vašych kryptakašalkoŭ zašyfravanymi ŭ nadziejnym miescy, a nie prosta ŭ vyhladzie tekstu na rabočym stale Windows.

Čytajcie taksama:

U siecivie raspaŭsiudžvajecca niebiaśpiečny virus, jaki paražaje MacOS praz sacsietku Telegram

Skandał u śviecie biaśpieki: miesiendžar, jaki abiacaŭ «zvyšbiaśpieku», zachoŭvaŭ źviestki karystalnikaŭ dastupnymi dla ŭsich i dazvalaje rasšyfravać paviedamleńni

Papularny dadatak dla Android staŭ tajemna špijonić za ŭsimi karystalnikami praź mikrafon i kamieru

Kamientary da artykuła