Ryhoru Kastusiovu praciahnuli termin znachodžańnia pad vartaj da lutaha
Staršyni Partyi BNF Ryhoru Kastusiovu čarhovy raz praciahnuli termin utrymańnia pad vartaj jašče na dva miesiacy — da 12 lutaha 2022 hoda. Pra heta «Mahiloŭskamu rehijonu» raskazała dačka palityka Kaciaryna Kastusiova.
Ciapier Ryhor Kastusioŭ znachodzicca ŭ respublikanskaj turemnaj balnicy ŭ SIZA-1 pa vulicy Vaładarskaha ŭ Minsku, kudy jaho pieraviali ŭ kancy listapada ź SIZA KDB u suviazi z abvastreńniem šerahu chvarobaŭ.
Kaciaryna Kastusiova kaža, što na minułym tydni jana naviedała SIZA-1 i parazmaŭlała z daktarami Respublikanskaj balnicy dla asudžanych. Pa jaje słovach, doktar paćvierdziŭ, što ŭ baćki ankałahičnaje zachvorvańnie, ale razam z tym śćviardžaŭ, što patreby ŭ terminovaj apieracyi pakul što niama.
Miedykam ciapier važna viedać vyniki analizaŭ Kastusiova šmathadovaj daŭniny, kab nazirać za dynamikaj zachvorvańnia i vybrać pravilnyja mietady lačeńnia, skazaŭ joj doktar. Dla atrymańnia hetaj infarmacyi miedykam patrebna zrabić zapyt u balnicu, u jakoj Kastusioŭ naziraŭsia, kali znachodziŭsia na voli.
Ryhora Kastusiova zatrymali ŭ Škłovie jašče 12 krasavika hetaha hoda. Kastusiova abvinavačvajuć u zmovie z metaj zachopu ŭłady. Z taho času palityk znachodzicca za kratami.