Zhareŭ za piać dzion. U Viciebsku ad karanavirusa pamior 58-hadovy pałkoŭnik prakuratury
dapoŭniena
U Viciebsku za niapoŭny tydzień ad pnieŭmanii zhareŭ były śledčy pa najvažniejšych spravach Viciebskaj abłasnoj prakuratury, pałkoŭnik u adstaŭcy, 58-hadovy Anatol Vysocki.
Byłyja kalehi raskazali «Našaj Nivie», što tolki ŭ paniadziełak 30 sakavika jon adkryŭ balničny, a ŭžo ŭ piatnicu, 3 krasavika, im paviedamili pra zapłanavanaje na niadzielu pachavańnie.
U vyniku publičnaha raźvitańnia nie budzie, bo pryjšoŭ paśmiarotny analiz na karanavirus — stanoŭčy…
Hetuju infarmacyju «Našaj Nivie» paćvierdziła žonka pamierłaha.
«Uziali analiz — jon paćvierdziŭsia. Heta nie chavajecca. Jak stali viadomyja vyniki — pazvanili z sanepidemstancyi.
Nam ciapier testy hetyja zrobiać: zaraz pryjeduć apracavać kvateru, testy — i na izalacyju.
My ž nie mahli navat padumać, što ŭ jaho stanoŭčy vynik! I adkul ža ja viedaju, dzie jon moh zarazicca?
My ž nie jeździli nikudy, na miescy byli. Ja na rabotu i z raboty, nu ŭ kramu zajdu. Jon taksama ŭ kramu moh zajści, na rynak, na lecišča — usio. A tak jon doma siadzieŭ, piensijanier, nikudy nie vychodziŭ, nie jeździli nikudy.
Pačynałasia z tempieratury, try dni patempieraturyŭ — 38. Jon sam źviazvaŭ heta z prostaj prastudaj, maŭlaŭ, byŭ na leciščy, jak jon kazaŭ, drovy składvaŭ, pratapiŭ, vybieh na vulicu — nu, moža, pradźmuła, prastyŭ dy prastyŭ… Padumać nie mahli, što ŭ nas moža być niejki karanavirus», — skazała «Našaj Nivie» žonka.
Sa słoŭ žonki, u pałkoŭnika Vysockaha była arytmija, jon byŭ sardečnik.
Jak viadoma, karanavirusnaja infiekcyja daje ŭskładnieńni ŭ formie pnieŭmanij. Asabliva ciažka jaje pieranosiać ludzi starejšaha ŭzrostu, z chraničnymi zachvorvańniami. Pa zaraznaści karanavirus padobny da hrypu.
Čytajcie taksama: «A my praciahvali prymać adpačyvajučych». U infiekcyjoncy pamior supracoŭnik sanatoryja «Praleska» ŭ Ždanovičach
Situacyja ŭ Viciebsku vyklikała tryvohu z druhoj pałovy sakavika, kali adtul stała pastupać infarmacyja pra nienarmalna vialikuju kolkaść pnieŭmanij. Ułady spačatku nazyvali heta čutkami i pahražali pakarańniami za raspaŭjudžvańnie paniki.
31 sakavika Viciebsk staŭ temaj spatkańnia prezidenta Biełarusi Alaksandra Łukašenki sa staršynioj Savieta Respubliki Natalli Kačanavaj. Kačanava pabyvała ŭ Viciebsku. «Situacyja absalutna kiravanaja, daktary razumiejuć, što treba rabić», — było zajaŭlena na sustrečy.
Tady ž, 31 sakavika, ułady paćvierdzili śmierć zasłužanaha artysta Biełarusi, akciora viciebskaha Teatra imia Jakuba Kołasa 75-hadovaha Viktara Daškieviča. U jaho byŭ vyjaŭleny karanavirus.
Teatr spyniŭ śpiektakli. Pavodle infarmacyi ŭdavy Daškieviča, pa mienšaj miery, u piaci supracoŭnikaŭ teatra zapaleńnie lohkich, ich špitalizavali.
Akramia taho, jašče dźvie siamji ź Viciebska pieršymi zajavili, što ich rodnyja — 73-hadovaja Alaksandra Čepik i 58-hadovaja Taćciana Chuziejeva — pamierli, budučy špitalizavanyja ź ciažkimi pnieŭmanijami. Abiedźvie siamji śćviardžajuć, što im telefanavali sansłužby i paviedamlali pra stanoŭčyja proby na karanavirus. U dačynieńni da Chuziejevaj Ministerstva achovy zdaroŭja paźniej abvierhła hetuju infarmacyju. U Čepik u paśviedčańni pra śmierć byŭ ukazany karanavirus.
Akramia taho, u Viciebsku ad karanavirusa pamior 70-hadovy adstaŭnik Uładzimir Sidaraŭ, były kapitan fłota.
Viadoma taksama pra śmierć ad pnieŭmanii miedsiastry, što pracavała ŭ balnicy, dzie lažać chvoryja na karanavirus. Što tyčycca jaje vypadku, ułady nie dali infarmacyi adnosna suviazi jaje śmierci z COVID-19.
Čytajcie taksama: «Bajalisia nieści dadomu svaju formu». Stała bolš viadoma pra 47-hadovuju miedsiastru, jakaja pamierła ŭ Viciebsku
Na žal, aficyjnaja infarmacyja pra kolkaść pacyjentaŭ z dyjahnazam «pnieŭmanija» u Viciebsku i vobłaści nie publikujecca. Pryvatnym čynam miedyki kažuć pra toje, što pacyjentaŭ z zapaleńniem lohkich u horadzie našmat bolš, čym zvyčajna ŭ hety čas hoda.
Alaksandr Łukašenka 31 sakavika na sustrečy sa staršynioj Savieta Respubliki Natallaj Kačanavaj pryznaŭ, što ŭ Viciebskaj vobłaści nazirajecca ŭsplosk zachvorvańniaŭ, ale nie źmianiŭ svajho staŭleńnia da pandemii.
«Vy ŭ mianie čałaviek mužny. Sałdat taki, što i ŭ vychadnyja adpracavali ŭ prablemnym rehijonie, rodnaj svajoj vobłaści. Ja nie kažu, što tam katastrofa niejkaja, nie. Prosta Viciebskaja vobłaść u nas zaŭsiody, i pa klimacie inšaja, i trochi zrušyŭsia hety pik zachvorvańnia. Siońnia tam pracuje ministr achovy zdaroŭja, ja nakiroŭvaŭ jaho tudy i śpiecyjalistaŭ, kab jany źviarnuli ŭvahu, praanalizavali i zrabili vysnovy».
U svaju čarhu, Kačanava zajaviła: «Situacyja absalutna kiravanaja. Daktary razumiejuć, što treba rabić».
«Ja doktarka, pracuju ŭ Viciebsku ŭ balnicy chutkaj miedycynskaj dapamohi. U našym horadzie situacyja pačała vychodzić z-pad kantrolu! Miedyki chutka nie buduć davać rady napłyvu chvorych. Šmat daktaroŭ znachodzicca ŭ balnicach z zapaleńniem lohkich! Raspaŭsiudźcie hetuju infarmacyju ŭ sacyjalnych sietkach. Ličby, tyja, što padajuć u SAAZ, absalutna mifičnyja», — napisała 30 sakavika na svajoj staroncy «UKantakcie» doktarka ź Viciebska Natalla Łaryjonava. Paźniej jaje vyklikali ŭ prakuraturu, kab jana dała tłumačeńni pra hety svoj zapis.
U adroźnieńnie ad inšych jeŭrapiejskich krain, u Biełarusi nie ŭviedzienyja aficyjnyja karancinnyja abmiežavańni.
Usiaho pa stanie na 4 krasavika ŭłady Biełarusi zajavili pra 440 paćvierdžanych vypadkaŭ karanavirusa i 5 śmierciaŭ.
Tym časam pa stanie na ranak 5 krasavika ŚMI apublikavali 11 paviedamleńniaŭ pra śmierć ad karanavirusa sa spasyłkami na rodnych pamierłych ci na miedycynski piersanał nižejšaha źviana. Hetyja śmierci adnosilisia da žycharoŭ Viciebska, Minska, Kapylskaha rajona, a taksama supracoŭnika sanatoryja ŭ Minskim rajonie, miesca žycharstva jakoha nie ŭkazvałasia.