Kanstruktar «Leha» admovicca ad płastyku
Dacki vytvorca kultavych cacak-kanstruktaraŭ źbirajecca pierajści na ekałahičnuju syravinu.
Siamja Krystyjansen, jakaja vałodaje Lego, vyrašyła ŭ budučyni admovicca ad vyrabu cacak z płastyku
Užo sioleta ŭ prodaž musiać pastupić pieršyja elemienty znakamitaha kanstruktaru, vyrablenyja z polietylenu na asnovie cukrovaha tryśniahu, paviedamlaje na svaim sajcie kampanija. Heta buduć detalki, jakija imitujuć dreŭcy, kusty dy liście.
Jak śćviardžaje kampanija, vizualna dy navobmacak adroźnić detalki z arhaničnaj płastmasy ad zvyčajnych budzie amal niemahčyma.
Lego źbirajecca da 2030 hoda całkam pierajści na ekałahičnyja materyjały ŭ kanstruktarach i ŭpakoŭcy. Pry hetym jana budzie admysłova sačyć, kab cukrovy tryśnioh dla syraviny vyroščvaŭsia ekałahičnym sposabam.
Siamja Krystyjansen zasnavała Lego ŭ 1932 hodzie. Darečy, nazva kampanii pachodzić ad dackaha vyrazu leg godt, što značyć «hulajsia dobra». Z taho času kampanija pieratvaryłasia ŭ adnaho z najbujniejšych vytvorcaŭ cacak u śviecie z hadavym abarotam, bolšym za $2 miljardy.
Cikava, što spačatku kampanija vyrablała maleńkija cacki z dreva, a na płastyk pierajšła tolki ŭ 1947 hodzie. Ciapier, u niejkim sensie, Lego viartajecca da karanioŭ.