Na Marsie znajšli voziera z vadoj
Navukoŭcy abviaścili, što ŭpieršyniu znajšli dokazy najaŭnaści na Marsie vady — u vadkim stanie. Voziera pamieram kala 20 kiłamietraŭ znachodzicca la paŭdniovaha polusa płaniety i schavana pad toŭstaj ledzianoj šapkaj.
Raniej daśledčyki mierkavali, što pa pavierchni Marsa moža časam nienadoŭha raźlivacca vada ź ledavikoŭ, jakija rastali (z ulikam nizkaha cisku vada pavinna vielmi chutka vyparvacca), adnak upieršyniu źjavilisia padstavy mierkavać, što na Čyrvonaj płaniecie isnuje i pastajanny vadki vodny reziervuar.
Marsachod NASA raniej znachodziŭ na pavierchni płaniety tolki suchija aziory, davioŭšy, što ŭ minułym vada na Marsie była.
Adnak z tych časoŭ tempieratura na płaniecie značna paniziłasia z-za vielmi razredžanaj atmaśfiery — i vialikaja častka vady pieratvaryłasia ŭ lod.
«Mahčyma, heta nie vielmi vialikaje voziera», — kaža kiraŭnik daśledavańnia, prafiesar Italjanskaha nacyjanalnaha instytuta astrafiziki Rabierta Arasiei.
Choć samo isnavańnie vodnaha reziervuara cikavić ludziej, što vierać u mahčymaść isnavańnia na Marsie žyćcia — chaj navat u minułym, — charaktarystyki voziera jašče treba paćvierdzić dalejšymi daśledavańniami.