Viber mohuć zabłakavać u Rasii śledam za Telegram
Viber, adzin z samych papularnych miesiendžaraŭ u Rasii, nie zmoža vykanać patrabavańnie FSB ab pieradačy klučoŭ dla dešyfroŭki pierapiski: u kampanii ich prosta niama, paviedamlaje RBK.
Kampanija ź biełaruskimi karaniami Viber Media S.a.r.I. ( «Dačka» japonskaj Rakuten), jakaja vałodaje adnajmiennym miesiendžaram, hatovaja supracoŭničać z uładami roznych krain, ale klučy dla dešyfroŭki paviedamleńniaŭ pradastaŭlać nie budzie.
Kampanija nie vykanaje patrabavańnie, nievykanańnie jakoha ŭžo abiarnułasia pahrozaj błakavańnia dla inšaha papularnaha mieśsiendžiera — Telegram. U pačatku tydnia, 20 sakavika, Raskamnahlad abaviazaŭ kampaniju Paŭła Durava Telegram Messenger LLP na praciahu 15 dzion padać FSB klučy dla dešyfroŭki paviedamleńniaŭ karystalnikaŭ. U vypadku admovy Raskamnahlad praz sud moža zabłakavać Telegram.
Viber uvachodzić u lik samych papularnych u Rasii dadatkaŭ dla znosin: u studzieni 2018 hoda, pa dadzienych Mediascope, štodzionnaja aŭdytoryja miesiendžara ŭ haradach z nasielnictvam ad 100 tysiač čałaviek na desktopach i ŭ mabilnych pryładach skłała 9,4 młn čałaviek. Dla paraŭnańnia: u «Vkontaktie» — 22,6 młn, WhatsApp — 12,2 młn, «Adnakłaśnikaŭ» — 7,4 młn, Facebook — 5 młn, Telegram — 2,5 młn.