VPS ZŠA: Pavodziny rasijskich piłotaŭ śviedčać pra nieprafiesijanalizm
Rasijskaja vajskovaja avijacyja ŭ apošnija hady pavodzić siabie praźmierna pravakacyjna, što śviedčyć pra słaby prafiesijny ŭzrovień, adznačyŭ na dniach načalnik štaba VPS ZŠA Devid Hołdfiejn.
Pra słovy Hołdfiejna padčas bryfinhu-spravazdačy VPS ZŠA paviedamiŭ partał militarytimes.com.
Tolki ŭ hetym hodzie rasijskija samaloty niekalki razoŭ pavodzili siabie niebiaśpiečna pobač z amierykanskimi mašynami, u tym liku bambardziroŭščyk Su-24 vielmi nizka pralacieŭ pobač z eśmincam «Donald Kuk» u Čornym mory.
Incydent adbyŭsia ŭ krasaviku. Fota wikimedia.org
Incydenty adbyvalisia i z samalotami inšych zachodnich krain, navat hramadzianskimi łajnierami. Da taho ž, u červieni bajavyja samaloty RF nanieśli ŭ Siryi bombavy ŭdar pa bazie, jakaja vykarystoŭvałasia amierykanskim padraździaleńniem śpiecyjalnaha pryznačeńnia, niahledziačy na nieadnarazovyja papiaredžańni.
«50 hod my pierachoplivali adzin adnaho ŭ mižnarodnaj prastory. Možna było b spytacca: čamu my heta rabili? Tamu što my prytrymlivalisia peŭnych praviłaŭ», — skazaŭ Hołdfiejn, sam były piłot F-16.
«Ja vielmi zaniepakojeny paraj niadaŭnich incydentaŭ z udziełam rasijan, tamu što jany pakazvajuć nieprafiesijanalizm, u adroźnieńnie ad taho, što my bačyli raniej [u časy Chałodnaj vajny]», — dadaŭ hienierał.