Navukoŭcy ŭpieršyniu ekśpierymientalnym šlacham pieramahli VIČ
Hrupie navukoŭcaŭ z Templskaha ŭniviersiteta ŭ ZŠA, jakoj kiravaŭ Kemieł Chalili, udałosia paśpiachova vyrazać siehmient DNK, jaki naležaŭ VIČ, z hienomu žyvych žyvioł. Pra vyniki raboty havorycca ŭ pres-relizie ŭniviersiteta, na jaki spasyłajecca Naked Science.
Navukoŭcy vykarystali technałohiju redahavańnia hienaŭ CRISPR/Cas9. Raniejšyja daśledavańni pakazali, što jaje možna paśpiachova vykarystoŭvać dla vydaleńnia hienaŭ virusa, jakija ŭbudavanyja ŭ hienom kletki-haspadara.
Važna toje, što takoje ŭmiašańnie nie pahražaje apošnim. Byli praviedzienyja vyprabavańni na kletkach pacyjentaŭ — nośbitaŭ VIČ, što dakazała dobryja pierśpiektyvy mietodyki.
Vyprabavać novy mietad na žyviołach udałosia tolki ciapier. Daśledčyki vykarystoŭvali pacukoŭ i myšej, infikavanych VIČ. Navukoŭcam udałosia vyrazać metavy siehmient VIČ z DNK žyvych arhanizmaŭ.
U relizie adznačajecca, što vynik pierasiahnuŭ samyja śmiełyja čakańni. Analiz, praviedzieny praz dva tydni paśla pačatku takoha lačeńnia, pakazaŭ poŭnuju adsutnaść VIČ u kletkach kryvi, hałaŭnoha mozhu, nyrak, piečani, sielazionki i lohkich. Taksama nazirałasia značnaje źnižeńnie virusnaj RNK u kletkach limfacytaŭ i limfatyčnych vuzłach.
Niekatoryja śpiecyjalisty ŭžo nazvali vynik revalucyjnym. Jość usie padstavy vieryć, što ŭ kančatkovym vyniku heta taksama zmoža dapamahčy i miljonam zaražanych VIČ ludziej.
Jak viadoma, antyretravirusnyja preparaty, jakija tradycyjna vykarystoŭvajucca pry VIČ, majuć adzin niedachop: jany nie viaduć da vydaleńnia virusa z kletak, a tolki pryhniatajuć jaho razmnažeńnie, i tamu nie dajuć mahčymaści kazać ab poŭnaj pieramozie nad virusam, choć pry vykarystańni antyretravirusnaj terapii žyćcio pacyjenta možna padoŭžyć da 80 hadoŭ.