Baskietbalist Kobi Brajant pravioŭ apošni matč u karjery FOTA
Kobi Brajant, adzin z samych viadomych amierykanskich baskietbalistaŭ, zaviaršyŭ svaju 20-hadovuju karjeru ŭ hetuju sieradu.
LA Times
«Łos-Andželes Lejkiers», kamanda za jakuju Brajant hulaŭ šmat hadoŭ, abyhrała «Jutu Džaz» ź likam 101:96 u chatnim matčy rehularnaha čempijanatu Nacyjanalnaj baskietbolnaj asacyjacyi (NBA).
Brajant staŭ samym vynikovym hulcom apošniaha matču ŭ svajoj karjery: jon nabraŭ 60 ačkoŭ. Jon taksama staŭ samym vynikovym hulcom siezona.
Uvieś matč byŭ pryśviečany sychodu Brajanta, na jaho byli akredytavanyja niekalki sotniaŭ žurnalistaŭ. Vakoł budynka stadyjona Staples Center u Łos-Andželesie sabralisia tysiačy fanataŭ baskietbalista. Hledačy pastajanna apładziravali Brajantu. «Łos-Andželes Lejkiers» nie zmoh prabicca ŭ płej-of.
Brajant staŭ piatym hulcom u historyi NBA, jaki zmoh adyhrać 20 siezonaŭ, i pieršym hulcom, jaki ŭsiu svaju prafiesijnuju karjeru vystupaŭ za adzin kłub.
Jon zavajavaŭ piać čempijonskich tytułaŭ, 18 razoŭ prymaŭ udzieł u «Matčy zorak NBA», čatyry razy stanaviŭsia najlepšym hulcom hetych sustreč. Taksama jon uvachodziŭ u nacyjanalnuju zbornuju ZŠA, jakaja dvojčy vyjhrała zołata na Alimpijskich hulniach.
37-hadovy Brajant u listapadzie minułaha hoda zajaviŭ, što hety siezon stanie apošnim u jaho karjery.
***
Tym časam vyznačylisia ŭsie pary płej-of:
Uschodniaja kanfierencyja
Kliŭlend — Detrojt
Taronta - Indyjana
Majami - Šarłot
Atłanta - Bostan
Zachodniaja kanfierencyja
Hołden Stejt - Chjustan
San-Antonia - Memfis
Akłachoma — Dałas
Klipiers — Portlend