Rasieja praciahnie svoj "samy durny" prajekt
…Usio vyraźniej vymaloŭvajecca i perspektyva kredytnaje piatli dla Biełarusi. Piša ŭ svaim błohu Alaksandar Kłaskoŭski.
Rasiejski ambasadar Surykaŭ apošnim časam upeŭniena zajaŭlaje, što haz dla Biełarusi kali i padaražaje z krasavika, to nia bolej čym na 10%. Heta znoŭ prahučała na presavaj kanferencyi 11 lutaha. Jak vyśvietliłasia, taki limit padvyšeńnia ciaham hodu zakładzieny ŭ kantrakcie. Biezapelacyjnaść ličby lišni raz paćviardžaje, što cana — palityčnaja.
Miž tym napiaredadni pieršy vice-premjer Rasiei Siarhiej Ivanoŭ na kanferencyi ŭ Miunchienie sprabavaŭ davieści, što cana ichnich enerhanośbitaŭ vyznačajecca "ŭsim viadomaj prazrystaj rynkavaj formułaj". Lhoty ž dla Biełarusi patłumačyŭ tak: Łukašenka, maŭlaŭ, kaža, što ŭ jaho niama hrošaj, kab raźličvacca pavodle eŭrapiejskich stavak. A što, chiba nia rynkavy arhument? :)
Nasamreč, kaniešnie, ciažka pavieryć, što Kreml źlitavaŭsia nad biednym partneram pa "bratniaj intehracyi". Analityki budujuć versii nakont zakulisnych abiacańniaŭ biełaruskaha boku. Va ŭsiakim razie, z vykazvańniaŭ Surykava možna zrabić vysnovu, što Maskva nadta choča atrymać zamovu na AES dy dacisnuć narešcie pahadnieńnie pra abjadnanuju systemu supraćpavietranaj abarony (Łukašenka ŭ svoj čas daŭ zrazumieć, što heta hrošaj kaštuje).
A voś nakont perspektyvaŭ kanstytucyjnaha aktu Surykaŭ vykazaŭsia nadta ćmiana. Z namiokam na toje, što sama Rasieja moža zajmieć kłopaty, kali nadnacyjanalnyja orhany atrymajuć vialikija paŭnamoctvy.
Tak što hetyja intehracyjnyja hulni — kij z dvuma kancami. Bolej praŭdapadobnaj, čym farsavańnie anšlusu, vyhladaje versija pra toje, što Kreml robić staŭku na paŭzučuju ekanamičnuju ekspansiju. Zaraz ža ŭsio vyraźniej vymaloŭvajecca i perspektyva finansavaj piatli dla Biełarusi. Voś i pad AES, jak vynikaje sa słoŭ ambasadara, Maskva hatovaja dać admysłovy kredyt...
Tym časam kančatkova rastajuć nadziei aficyjnaha Miensku na vyhady ad prakładki druhoj nitki hazapravodu Jamał — Eŭropa. Surykaŭ dyplamatyčna zaznačyŭ, što jaje metazhodnaść uzvažać chiba što paśla pabudovy "Paŭnočnaj płyni". Kali pamiatajecie, mienavita hety namier prakłaści trubu pa dnie Bałtyki Łukašenka nazvaŭ "samym durnym" prajektam Rasiei.