Школе ў Навагрудку прысвоілі імя Язэпа Драздовіча
Сярэдняй школе № 7 у Навагрудку прысвоілі імя вядомага беларускага мастака Язэпа Драздовіча. Урачыстае мерапрыемства з гэтай нагоды адбылося 17 верасня, піша мясцовая раёнка «Новае жыццё».
Алена Казак на фоне партрэта Язэпа Драздовіча. Фота: «Новае жыццё»
Як расказала дырэктарка школы Алена Казак, дамагчыся прысваення навучальнай установе імя мастака было няпроста. Паколькі ў Язэпа Драздовіча не было дзяцей, знайсці яго нашчадкаў аказалася складана, а без іх згоды прысвойваць імёны аб'ектам нібыта нельга.
Супрацоўнікі Мастацка-этнаграфічнага музея імя Драздовіча ў Шаркаўшчынскім раёне дапамаглі высветліць, што ў мастака ёсць далёкі сваяк, які працуе ў Глыбоцкім лясніцтве. Дырэктарка знайшла яго і атрымала згоду на тое, каб школе прысвоілі імя Драздовіча.
Язэп Драздовіч (1888-1954) быў мастаком, этнографам і пісьменнікам. Ён нарадзіўся ў вёсцы Пунькі цяперашняга Глыбоцкага раёна, вучыўся ў Віленскай рысавальнай школе, шмат падарожнічаў па Беларусі, замалёўваў архітэктуру, побыт і краявіды.
У 1927—1929 гадах Язэп Драздовіч выкладаў маляванне ў Навагрудскай беларускай гімназіі. Акрамя таго, ён стварыў цыкл работ, прысвечаных Навагрудчыне.
Асаблівае месца ў яго творчай спадчыне займаюць фантастычныя карціны, прысвечаныя космасу і планетам.
Чытайце таксама:
Знайшоўся невядомы твор Язэпа Драздовіча
На Глыбоччыне выпадкова адшукалі яшчэ адну працу Язэпа Драздовіча
Выйшла кніга, якая апавядае пра беларускіх мастакоў праз казкі