Беларуса асудзілі ў Маскве за крадзеж з сэкс-шопа
У Маскве 26‑гадовага беларуса асудзілі за крадзеж з сэкс-шопа. Хлопец вынес адтуль без аплаты рэалістычны сімулятар ніжняй часткі жаночага цела, піша Shot.
Ілюстрацыйны здымак. Фота: Mike Kemp / In Pictures via Getty Images
Паводле выдання, беларус зайшоў у краму і папрасіў прадаўца прынесці яму сэкс-цацку. Даведаўшыся, што тавар каштуе 21 тысячу расійскіх рублёў — каля 750 беларускіх, мужчына вырашыў яго не купляць. Замест гэтага ён узяў гумовае тулава пад паху і выбег з крамы, не рэагуючы на крыкі прадаўцоў.
Але збегчы мужчыну не ўдалося: здарэнне трапіла на камеры відэаназірання. Паліцыя затрымала хлопца, а скрадзены тавар у яго забралі.
У судзе ён прызнаў віну і папрасіў прабачэння. Таксама высветлілася, што ён працуе і фінансава дапамагае бацькам і бабулі.
Суд прызначыў хлопцу за рабаванне 240 гадзін абавязковых работ.