«Беларусьфільм» выбраў чатыры праекты для будучых экранізацый

Кінастудыя «Беларусьфільм» вызначыла чатыры сцэнарныя праекты, якія рэкамендаваныя для далейшай распрацоўкі і магчымай экранізацыі ў 2027—2028 гадах. Пра гэта паведамілі ў Міністэрстве культуры.

Фота ілюстрацыйнае

Праекты былі адабраныя па выніках конкурсу сцэнарных матэрыялаў для поўнаметражных і тэлевізійных мастацкіх фільмаў.

У фінал конкурсу з амаль 250 пададзеных заявак прайшлі 16 праектаў. Пасля іх разгляду мастацкая рада выбрала чатыры гісторыі:

• «Па слядах Белай маланкі» Аляксандры Шышовай;
• «Ванькава лета» Андрэя Бурыма;
• «Вужовая карона» Маі Ветравай;
• «Кумаха — дэман восені» Вячаслава Яфрэмава.

Генеральны дырэктар «Беларусьфільма» Дзмітрый Сямёнаў адзначыў, што члены мастацкага рады ўважліва аналізавалі кожны сцэнар. Адной з галоўных задач было знайсці цікавыя гісторыі, якія сапраўды вартыя перанясення на экран, а таксама выявіць новых аўтараў, здольных працаваць у кінаіндустрыі.

Цяпер адабраныя праекты чакае дэталёвая распрацоўка. На кінастудыі падкрэсліваюць, што ад ідэі да запуску вытворчасці фільма неабходна правесці вялікую падрыхтоўчую працу.

Каментары да артыкула