Пад Гроднам знайшлі велізарны грыб памерам з чалавечую галаву ФОТЫ

Незвычайнай знаходкай падзялілася жыхарка Гродна Інна. Падчас прагулкі ў раёне вёскі Караліно яна заўважыла вялікі грыб — порхаўку, якая па памерах была прыкладна як галава чалавека, паведамляе newgrodno.by.

Фота: newgrodno.by

Грыб не ўзважвалі, але па фотаздымках можна ацаніць яго памеры: на адным з кадраў відаць, як знаходку нясуць дадому, а побач для параўнання знаходзіцца хатні гадаванец.

Фота: newgrodno.by

Гаворка ідзе пра порхаўку, або галавач гіганцкі — так ён афіцыйна называецца. Звычайна такі грыб можа вырастаць да 50—70 сантыметраў у дыяметры, а яго вага складае ад 1 да 4 кілаграмаў. Аднак вядомыя выпадкі, калі асобныя экземпляры важылі больш за 20 кілаграмаў.

Гэты від лічыцца ўмоўна ядомым, але ўжываць яго ў ежу можна толькі ў маладым узросце. Калі мякаць унутры белая і шчыльная — грыб прыдатны для прыгатавання. Калі ж яна стала бурай, жоўтай або зялёнай, гэта сведчыць пра тое, што грыб пераспеў, і есці яго ўжо не варта.

Каментары да артыкула