Дроны ўдарылі па складах Wildberries і НПЗ у Валгаградзе
З 18 ліпеня Украіна ўжо атакавала 10 лагістычных тэрміналаў Wildberries.
У выніку масіраванай начной атакі беспілотнікаў былі зафіксаваныя ўзгаранні на «складскіх памяшканнях» у Дзяржынскім раёне Валгаграда, а таксама на прамысловым прадпрыемстве паліўна-энергетычнага комплексу на поўдні горада, паведаміў губернатар Валгаградскай вобласці Андрэй Бачароў.
Ён не назваў, якія менавіта прадпрыемствы пацярпелі. У Дзяржынскім раёне Валгаграда вясной мінулага года пачаў працу буйны лагістычны цэнтр кампаніі Wildberries.
Да гэтага, пачынаючы з 18 ліпеня, Украіна ўжо атакавала 10 лагістычных тэрміналаў Wildberries. Напярэдадні, 30 ліпеня, маштабныя пажары адбыліся на складах кампаніі ў Пензе і ўдмурцкім горадзе Сарапул.