Пракурор запытаў для гарадзенскай актывісткі Валянціны Навумавай сем гадоў зняволення
Апошняе паседжанне па палітычна матываванай справе гарадзенкі Валянціны Навумавай павінна адбыцца 24 ліпеня
Працэс пачаўся 29 чэрвеня ў абласным судзе. Вядзе працэс суддзя Мікалай Рачынскі. За яго плячыма дзясяткі палітычна матываваных крымінальных спраў, піша «Гарадзенская праваабарона»
Навумавай інкрымінаваныя наступныя артыкулы:
- артыкул 16, частка 6 (Пасобніцтва ў суўдзеле ў злачынстве)
- артыкул 130, частка 1 (Распальванне іншай сацыяльнай варожасці)
- артыкул 130, частка 3 (Дзеянні, якія прадугледжаны часткамі 1 ці 2 артыкулу, здзейсненыя групай асобаў)
- артыкул 188 (Паклёп)
- артыкул 203-1, частка 3 (Парушэнне тайны перапіскі, тэлефонных перамоваў)
- артыкул 361-4, часткі 1 і 2 (Садзейнічанне экстрэмісцкай дзейнасці, тыя ж дзеянні, здзейсненыя паўторна)
- артыкул 367, частка 2 (Паклёп у дачыненні Лукашэнкі)
- артыкул 368, частка 1 (Абраза Лукашэнкі)
- артыкул 369 (Абраза прадстаўніка ўлады)
- артыкул 370 (Здзек з дзяржаўных сімвалаў)
- артыкул 391 (Знявага суддзі)
Валянціна Навумава доўгі час была сябрам партыі левых «Справядлівы свет». У 2017 годзе яна была аштрафаваная на 15 базавых адзінак па адміністрацыйнай справе за ўдзел у акцыі «недармаедаў».
Жанчыну затрымалі 5 верасня 2025 года і змясцілі ў турму №1 у Гродне. Спачатку ў справе фігураваў ч. 2 арт. 367 (паклёп на Лукашэнку).
Але 27 лютага 2026 года былі выстаўленыя новыя абвінавачванні паводле артыкулаў Крымінальнага кодэкса.