Некаторыя раёны Віцебшчыны і Магілёўшчыны будуць пяць гадоў дадаткова падтрымліваць
Аляксандр Лукашэнка падпісаў указ аб дадатковых мерах па развіцці асобных рэгіёнаў краіны. Дакумент разлічаны на перыяд да 2030 года і накіраваны на падтрымку раёнаў паўднёвага ўсходу Магілёўскай вобласці і Паазер'я ў Віцебскай вобласці.
Здымак ілюстрацыйны. Фота: «Наша Ніва»
Дзеянне ўказа распаўсюджваецца на Касцюковіцкі, Клімавіцкі, Краснапольскі, Крычаўскі, Слаўгарадскі, Хоцімскі і Чэрыкаўскі раёны Магілёўскай вобласці, а таксама на Браслаўскі, Гарадоцкі, Докшыцкі, Лепельскі, Мёрскі, Полацкі і Ушацкі раёны Віцебскай вобласці.
Дакумент прадугледжвае стварэнне больш спрыяльных умоў для развіцця эканомікі, адкрыцця новых прадпрыемстваў і рэалізацыі інвестыцыйных праектаў.
Для падтрымкі інвестараў з рэспубліканскага бюджэту будуць выдзяляцца сродкі, якія могуць пакрыць да 35 % капітальных выдаткаў па праектах, што рэалізуюцца з прыцягненнем крэдытаў Банка развіцця Беларусі. Пры гэтым праекты павінны пацвердзіць сваю эканамічную эфектыўнасць і абгрунтаваць тэрміны акупнасці.
Таксама ўказ прадугледжвае распрацоўку і зацвярджэнне праграмы сацыяльна-эканамічнага развіцця паўднёвага ўсходу Магілёўскай вобласці на 2026—2030 гады. Аналагічны раздзел будзе ўключаны і ў праграму развіцця Віцебскай вобласці. Разгледзець гэтыя дакументы павінны абласныя саветы дэпутатаў.
Чытайце таксама:
На Магілёўшчыне ліквідуюць аграхолдынг, у якім Лукашэнка некалі сварыўся за «абасраных кароў»
Лукашэнка падтрымаў прапанову аб узбуйненні Дрыбінскага раёна