У Мінску плануюць пабудаваць новы магістральны дажджавы калектар
У Мінску плануюць пабудаваць новы магістральны калектар ліўневай каналізацыі на вуліцы Ціміразева. Пра гэта паведаміў генеральны дырэктар прадпрыемства па будаўніцтве і ўтрыманні дарог і мастоў Мінгарвыканкама Уладзімір Латушкін.
Здымак ілюстрацыйны. Фота: БелТА
Па словах чыноўніка, сёлета ў сталіцы працягваецца рэканструкцыя ліўневых калектараў. Работы на двух аб'ектах ужо завершаныя, а ў найбліжэйшы час яны пачнуцца на вуліцах Парніковай і Якуба Коласа. Акрамя таго, да канца года плануюць абнавіць яшчэ тры-чатыры калектары, што павінна дапамагчы скараціць колькасць падтапленняў падчас моцных дажджоў.
Новы магістральны калектар на вуліцы Ціміразева будзе збіраць і адводзіць дажджавую ваду. Паводле ацэнак спецыялістаў, у Мінску ўжо ёсць развітая сетка ліўневай каналізацыі, аднак гораду не хапае менавіта буйных калектараў для эфектыўнага адводу вады.
Таксама сёлета працягваецца будаўніцтва пад'язной дарогі ад МКАД-2 да прамысловай зоны Калядзічы. Адкрыць рух па ёй плануюць да канца года, каб знізіць нагрузку на Мінскую кальцавую аўтамабільную дарогу.
Акрамя гэтага, ідзе рэканструкцыя вуліцы Лілі Карастаянавай. Яе плануюць увесці ў эксплуатацыю сёлета, каб палепшыць транспартную даступнасць новага жылога раёна «Паўночны бераг».
Чытайце таксама:
На сераду зноў абвясцілі апошні чырвоны ўзровень небяспекі — заўтра апошні дзень пекла
У Бабруйску спёка сёння днём рэзка змянілася на непагадзь ФОТЫ і ВІДЭА