У Беларусі спыняць вяшчанне каналы Discovery і Eurosport
З 1 ліпеня з сеткі вяшчання Zala IPTV знікне тэматычны пакет Discovery разам з яго галоўным каналам Discovery Channel. Акрамя таго, гледачы застануцца без спартыўных каналаў Eurosport 1 і Eurosport 2.
У Белтэлекаме патлумачылі прычыну: тэрмін дзеяння дамовы з праваўладальнікам падыходзіць да завяршэння.
На замену каналам, якія сыходзяць, Белтэлекам прапануе новы тэматычны пакет VIP HD. У яго ўваходзяць:
- Тэлеканал Viasat Nature/History HD з праграмамі пра прыроду, падарожжы, гісторыю і незвычайныя прыгоды.
- «Спартыўны тэлеканал Віясат HD» з трансляцыямі спаборніцтваў.
- Тэлеканалы TV1000 Premium, TV1000 Megahit, TV1000 Comedy і ViP Serial з фільмамі і серыяламі.
Каналы Discovery і Eurosport спыняюць вяшчанне пасля шматгадовай прысутнасці на беларускім рынку. Упершыню беларускаму гледачу гэтыя каналы сталі даступнымі напрыканцы 90‑х гадоў, з запускам іх вяшчання на постсавецкай прасторы, нагадвае БАЖ.