21‑гадовага хлопца са Светлагорска пасадзілі за палітыку. Хлопец жыў у дзетдоме, а нядаўна сам стаў бацькам
Захар Папушой са Светлагорска пайшоў пад суд па шэрагу палітычных артыкулаў.
Захар Папушой. Фота з ягонай старонкі УКантакце
Захар Папушой нарадзіўся 21 лютага 2005 года. У родным Светлагорску ён быў выхаванцам нядзельнай школы пры саборы Пятра і Паўла. У ліпені 2018 года хлопец паспяхова скончыў кадэцкія класы ў родным горадзе, пасля чаго паступіў у агульнавайсковае кадэцкае вучылішча ў Гомелі.
Захар таксама футбольны фанат, раней быў заўзятарам мясцовага клуба «Хімік».
Невядома, што здарылася ў сям'і, але хлопчык сустрэў паўналецце ў дзіцячым доме.
Апошнія гады Захар жыў у Мінску. Ён малады, але паспеў ужо стварыць сям'ю — вядома, што хлопец жанаты і гадуе сына.
Захара затрымалі летась. У гэтым годзе хлопца асудзілі ў Мінскім гарадскім судзе адразу па трох крымінальных артыкулах, якія выкарыстоўваюцца ў Беларусі для палітычных рэпрэсій: ч. 1 арт. 130 (распальванне варожасці), ч. 3 арт. 361‑1 (удзел у экстрэмісцкім фарміраванні) і ч. 1 арт. 130‑1 КК Беларусі (рэабілітацыя нацызму).
Сутнасць абвінавачання, як і прысуд, невядомыя, але маладога бацьку адправілі ў калонію.
Чытайце таксама:
75‑гадовую мінчанку асудзілі за «замах на садзейнічанне экстрэмізму»