«Нешта драматычнае не было перададзена». Франак Вячорка пракаментаваў скандал з Алінай Харысавай
Па справе палітолага Аліны Харысавай ідзе праверка, цяпер высвятляецца, якая інфармацыя была перададзена ці не перададзена «СБУ» (а насамрэч — КДБ), паведаміў у эфіры тэлеканала «Белсат» галоўны дарадца Святланы Ціханоўскай Франак Вячорка. Зрэшты, як ён сказаў, у яго «няма адчування», што беларускія спецслужбы атрымалі «нешта драматычнае».
Аліна Харысава і галоўны дарадца Святланы Ціханоўскай Франак Вячорка на канферэнцыі Reshape. Варшава, 15 чэрвеня 2025 года. Калаж з фота: Таццяна Верамеева / Белсат
«Пакуль што няма такога адчування, што нешта драматычнае было перададзена. Хутчэй за ўсё, гэта толькі перапіска, якую ўжо паказалі па тэлебачанні і асабістыя там нейкія ацэнкі», — сказаў галоўны дарадца Святланы Ціханоўскай Франак Вячорка ў эфіры «Студыі Белсат», каментуючы скандал з Алінай Харысавай.
«Рэжыму трэба было дадаць колераў і смаку ва ўсю гэтую гісторыю», — зазначыў Вячорка.
Ён лічыць, што ў гэтай сітуацыі спрацаваў чалавечы фактар. Спецслужбы шукаюць слабыя месцы, якія ёсць у людзей, калі яны ў цяжкім псіхалагічным стане, і «яны пішуць лісты, пішуць запыты на супрацоўніцтва, прапануюць бяспечнае вяртанне, шантажуюць блізкімі, затрымліваюць бацькоў, звоняць з тэлефонаў родных»:
«Апошні год гэта адбылося масава. І мы праводзілі інструктаж сярод усіх нашых калег, і тых, хто працуе ў штаце, ці тых, хто пазаштатна валанцёрамі, як Аліна, каб яны ні ў якім разе не адказвалі на паведамленні, але ну бачыце, што чалавечы фактар усё роўна дае збой».
Вячорка заклікаў дбаць пра бяспеку і інфармацыйную гігіену, не расслабляцца ў эміграцыі:
«Многія людзі, якія жывуць за мяжой, не адчуваюць рэпрэсіўнага апарату, не адчуваюць, што КДБ працуе. А супраць нас вялізная сістэма, тысячы людзей кожны дзень працуюць і шукаюць нашы слабыя месцы, таму трэба рабіць высновы, прызнаваць памылкі, дзе яны былі, трэніраваць людзей. Трэба кожны месяц, кожны год праводзіць трэнінгі нанова, ніколі не бывае гэта залішне».
Дарадца Ціханоўскай таксама адзначыў, што мэта такіх аперацый КДБ — не толькі паспрабаваць здабыць інфармацыю. Таму варта «трымаць дух»:
«Іхняя задача — пасеяць недавер, каб мы не давяралі адно аднаму, і ўсе ўсіх падазравалі».
Чытайце таксама:
Палітолаг Аліна Харысава пагадзілася супрацоўнічаць з СБУ. Аказалася, гэта быў КДБ
Харысава расказала, чаму павялася на правакацыю КДБ
Дэлегатцы КР Аляксандры Мамаевай вынеслі вотум недаверу ў яе ж фракцыі