Кватэры ў новабудоўлі ў цэнтры Гродна распрадалі за лічаныя хвіліны, але толькі зірніце, што там набудавалі
У новым квартале побач з гістарычным цэнтрам Гродна кватэры распрадалі за 2,5 хвіліны. На жаль, на такое жытло ўсё яшчэ ёсць попыт.
Адзін з дамоў у новым квартале. Фота: newgrodno.by
Што за дом і чаму такі попыт?
Новы квартал будуецца ў непасрэднай блізкасці ад гістарычнага цэнтра Гродна, дзе раней знаходзіліся гаражы і склады. І гэта, бадай, адно з апошніх, калі не апошняе месца ў цэнтры, дзе можна пабудаваць квартал са шматкватэрнымі дамамі.
Квартал будзе складацца з шасці шматпавярховікаў вышынёй ад 6 да 10 паверхаў, у якіх будзе 570 кватэр. Забудоўшчык — «Гроднажылбуд», які вядомы будаўніцтвам аднастайных панэлек.
Адзін з дамоў у новым квартале. Фота: newgrodno.by
Нягледзячы на тое, што там і без таго самы дарагі квадрат у дамах, якія будуе «Гроднажылбуд», кватэры ў гэтых панэльках карыстаюцца шалёным попытам.
Напрыклад, так было яшчэ ў снежні мінулага года, калі кватэры ў 10‑павярховым доме разабралі за гадзіну.
Хто не паспеў — той праляцеў
Днямі забудоўшчык запусціў анлайн-рэгістрацыю для браніравання кватэр а 12‑й гадзіне 28 мая і, па словах людзей, якія не паспелі зарэгістравацца, усе 100 месцаў у анлайн-чарзе ў доме на 90 кватэр разабралі за 2,5 хвіліны.
Скрыншот: ghb.by
Праз гэта людзі, якім не хапіла месцаў, гатовыя за грошы выкупіць месца ў чарзе на куплю кватэры.
Скрыншот: @vadimchela / Threads
«Гродна! Хто сёння паспеў зарэгістравацца на новабудоўлю на Астроўскага, 4, звяжыцеся са мной, гатовы выкупіць ваша месца», — напісаў мужчына ў Трэдсе.
Пазней мужчына адпісаў, што, дзякуючы Трэдсу, знайшліся добрыя людзі, гатовыя аддаць сваю рэгістрацыю за сімвалічную плату, але ўсё гэта аказалася бессэнсоўным, бо ў «Гроднажылбудзе» не далі магчымасці памяняцца з іншым чалавекам.
Маўляў, калі сам зарэгістравацца не паспеў, то, лічы, ты праляцеў, дадае ён.
І калі перакупіць месца ў чарзе немагчыма, то перапродаж кватэры цалкам рэальны.
У забудоўшчыка квадрат у двушках каштаваў 3500 рублёў. У адным з суседніх дамоў аналагічную планіроўкай і памерам кватэру на 55,8 метра прадаюць за 220 тысяч рублёў (80 тысяч даляраў), што амаль па 4000 рублёў за метр.
Скрыншот: kufar.by
Адметна, што 3 500 за метр ад забудоўшчыка і 4 000 ад прыватніка — гэта не самы дарагі квадрат у гэтым квартале.
У доме на рагу метр у аднапакаёўках на 50 квадратаў прадаецца па 4 500 рублёў (каля 1 600 даляраў). У двухпакаёўках на 85 метраў — па 3 900 рублёў (каля 1 380 даляраў), а ў трошках на 90 квадратаў метр па акцыі каштуе 3 600 рублёў (каля 1 272 даляраў). Гэта пры тым, што сярэдні кошт метра жытла ў Гродне складае каля 1 163 даляраў.
Чаму такі попыт на кватэры ў квартале на Астроўскага?
Нягледзячы на тое, што гэта і без таго самае дарагое жытло ад забудоўшчыка, шалёны попыт на кватэры ў гэтым квартале перш за ўсё абумоўлены не тым, што само па сабе жытло якасна іншага ўзроўню, а перш за ўсё лакацыяй.
Бо фактычна гэта шараговыя панэлькі ад «Жылбуда» без падземных парковак і іншых атрыбутаў якаснага дарагога жытла.
Па словах месцічаў, якія цікавіліся купляй нерухомасці ў гэтым квартале, многія аб'екты выкупляюць дзеля таго, каб пасля можна было выгадна здаваць кватэры на суткі, бо гістарычны цэнтр там літаральна за пару крокаў.
Квартал, які забудоўваць панэлькамі на 6‑10 паверхаў, знаходзіцца ў непасрэднай блізкасці да гістарычнага цэнтра Гродна. Скрыншот: «Гугл Мапс»
Кажуць, што кватэры ў гэтых дамах выкупляюць у тым ліку сталічныя інвестары. А паколькі пад здачу ў асноўным бяруць невялікія па плошчы кватэры, то менавіта на іх самы вялікі попыт, бо ў некаторых дамах, якія ўжо дабудавалі, у самога забудоўшчыка ёсць па некалькі кватэр. Але гэта жытло з вялікай квадратурай.
Дорага, але не крута?
Нягледзячы на высокі попыт і выдатную лакацыю, многім гараджанам недаспадобы гэты квартал праз тое, што гэта шараговыя панэлькі, якія ўваткнулі амаль у самы цэнтр горада. Пра рэакцыю гараджан на гэтую забудову «Наша Ніва» пісала раней.
У прыватнасці краязнаўца Мечыслаў Ян Супрон, які шмат гадоў змагаецца за захаванне гістарычна-культурнай спадчыны Гродна, называе такую забудову ў цэнтры жахлівай.
Візуалізацыя новага квартала. Фота: Гроднажылбуд
Многія гарадзенцы лічаць, што ў такой лакацыі варта было будаваць сучаснае нізкапавярховае жытло, а не панэлькі вышынёй да дзесяці паверхаў. Тым больш, што калі і такія кватэры разбіраюць як гарачыя піражкі, то цалкам магчыма, што быў бы попыт і на больш дарагое, але больш сучаснае жытло, якое магло б стаць годным працягам старога горада, а не чарговым кварталам са шматпавярховымі панэлькамі, якімі забудоўваюць ускраіны.