Украінца, які хацеў патаемна перабрацца ў Румынію, на мяжы затрымала сапраўдная мядзведзіца

На ўкраінскім Закарпацці адбыўся незвычайны выпадак: мужчына з Кіева, які спрабаваў незаконна перайсці мяжу з Румыніяй, сустрэўся па дарозе з дзікай мядзведзіцай. 

Здымак ілюстрацыйны. Фота: magnific.com

Украінец самастойна спланаваў маршрут у абыход афіцыйных пунктаў пропуску і пайшоў у дарогу ноччу. Аднак падчас пераходу мяжы нечакана трапіў на драпежную жывёліну. Каб уратавацца, мужчына быў вымушаны залезці на дрэва і там заставаўся некаторы час.

Знаходзячыся на вышыні, ён спрабаваў звярнуцца па дапамогу, хоць да іншых ягоных нягод далучыліся і праблемы са сувяззю. У выніку яго знайшлі на тым дрэве вайскоўцы памежнай службы. Да таго моманту мядзведзіцы побач ужо не было.

Памежнікі дапамаглі мужчыну бяспечна спусціцца з дрэва і даставілі яго ў падраздзяленне. За спробу незаконнага перасячэння мяжы на яго склалі адміністрацыйны пратакол. Цяпер яму пагражае штраф або нават кароткатэрміновы арышт.

У памежнай службе падкрэслілі, што спробы нелегальнага пераходу мяжы вельмі небяспечныя і могуць пагражаць жыццю і здароўю. Пераходзіць праз мяжу, маўляў, трэба толькі законным спосабам.

Каментары да артыкула