21‑гадовую дзяўчыну з Пінска асудзілі за палітыку. Яна вучылася ў Польшчы, але вярнулася ў Беларусь
На Яну Галімскую завялі справу за «садзейнічанне экстрэмісцкай дзейнасці».
Яна Галімская, фота з яе інстаграма. Фон па баках дамаляваны нейрасеткай
Яне Галімскай 21 год. Яна родам з Пінска. У 2021 годзе дзяўчына скончыла школу. Праз год паехала ў Польшчу, дзе спачатку паступіла ў Кракаў на падрыхтоўчы «нулявы» год, а пасля — ва ўніверсітэт. Ці паспела Галімская скончыць навучанне, дакладна не вядома.
Невядома таксама, ці яна вярнулася ў Беларусь, ці ездзіла туды адведаць бацькоў. Але яе арыштавалі ў другой палове мінулага года і змясцілі ў СІЗА.
Яну асудзілі ў Мінскім гарадскім судзе паводле частак 1 і 2 артыкула 361‑4 Крымінальнага кодэкса Беларусі — «садзейнічанне экстрэмісцкай дзейнасці». Дакладныя абставіны яе справы невядомыя.
Дзяўчыне прысудзілі хатнюю хімію.
Апошнім часам Галімская спрабуе зарабляць як рэпетытарка: са студзеня 2026 года яна выкладае польскую і беларускую мовы.