На наступным тыдні зноў будзе дажджыць, але і пацяплее
На наступным тыдні, з 11 па 17 мая, надвор’е ў Беларусі будзе больш адпавядаць звычайным майскім умовам. Сярэдняя тэмпература чакаецца каля кліматычнай нормы, а пацяпленне прагназуецца толькі бліжэй да выходных, паведаміў у эфіры тэлеканала АНТ сіноптык Дзмітрый Рабаў.
Фота: «Наша Ніва»
У пачатку тыдня надвор’е будзе вызначаць вобласць высокага атмасфернага ціску. У панядзелак істотных ападкаў у большасці раёнаў не чакаецца, толькі на захадзе краіны магчымыя кароткія дажджы і навальніцы. Уначы тэмпература складзе ад +4 да +9 градусаў, удзень — ад +12 да +17, а на поўдні і паўднёвым захадзе паветра прагрэецца да +23.
У аўторак надвор’е пагоршыцца праз цыклон з Балтыі. Чакаюцца кароткачасовыя дажджы, навальніцы і моцны парывісты вецер, месцамі да 20 метраў за секунду. Вільготнасць паветра будзе высокай, раніцай магчымы туман. Уначы тэмпература складзе +7…+12, удзень — ад +12 на захадзе да +23 на паўднёвым усходзе.
У сераду захаваецца няўстойлівае надвор’е з дажджамі і навальніцамі. На ўсходзе краіны месцамі магчымыя моцныя залевы. Будзе халадней: удзень ад +10 на поўначы да +17 на поўдні.
У чацвер зноў чакаюцца дажджы і навальніцы, асабліва ва ўсходніх раёнах. Уначы будзе ад +4 да +9 градусаў, а ўдзень — ад +9 на ўсходзе да +15 на захадзе.
У пятніцу ў Беларусь прыйдзе чарговы цыклон з Балтыйскага мора. У большасці рэгіёнаў прагназуюцца дажджы, месцамі моцныя, і свежы парывісты вецер. Нягледзячы на гэта, тэмпература ўдзень будзе адносна высокай — ад +16 да +21 градуса.
На выхадных надвор’е крыху палепшыцца. У суботу і нядзелю захаваецца пераменная воблачнасць, магчымыя кароткія лакальныя дажджы і навальніцы. Уначы і раніцай месцамі будзе туман. Тэмпература паветра ўдзень складзе ад +16 да +23 градусаў у залежнасці ад рэгіёна.
Чытайце таксама:
У панядзелак павінна пацяплець
У Мінску пасля дажджу падтапіла некаторыя вуліцы. Асабліва стыхія сваволіла на захадзе горада