У Будапешце знайшлі невядомую раней версію карціны Ван Гога
У Будапешце выявілі палатно, якое, на думку спецыялістаў, з’яўляецца невядомай раней работай нідэрландскага мастака Вінсэнта Ван Гога. Пра гэта заявіла мастацтвазнаўца Жофія Вегвары, кіраўніца лабараторыі вывучэння жывапісу.
Жофія Вегвары з карцінай. Фота: Pozsonyi Zita
Палатно было знойдзена падчас даследавання некалькіх работ, прадстаўленых замежным калекцыянерам. Па словах эксперткі, не выключана, што знойдзена яшчэ адна версія знакамітай карціны «Танцавальная зала ў Арле», датаванай 1888 годам. Арыгінал знаходзіцца ў парыжскім музеі Арсэ.
Карціна Ван Гога «Танцавальная зала ў Арле»
Папярэдні аналіз фарбаў, палатна і грунтоўкі дазваляе выказаць здагадку, што твор створаны ў перыяд з 1885 па 1890 год і сапраўды можа належаць пэндзлю Ван Гога. Вегвары нагадала, што мастак часта пісаў некалькі варыянтаў адной кампазіцыі, пра што згадваў у лістах да свайго брата Тэа.
Як адзначае інтэрнэт-выданне Blikk, у выпадку пацвярджэння сапраўднасці карціны адкрыццё стане адным з самых гучных у мастацтве XXI стагоддзя. Дырэктарка лабараторыі пакуль не раскрывае імя ўладальніка карціны і акалічнасці яе з’яўлення ў калекцыі.