Расія паскардзілася ў ЮНЕСКА на фільм, які атрымаў «Оскара». Кажуць, што не падумалі пра дзяцей

Расійская Рада па правах чалавека звярнулася ў ЮНЕСКА са скаргай на дакументальны фільм «Спадар Ніхто супраць Пуціна», які атрымаў прэмію «Оскар», піша The Moscow Times.

Кадр з фільма «Спадар Ніхто супраць Пуціна»

У звароце сцвярджаецца, што ў стужцы, якая паказвае, як у расійскай школе пасля пачатку вайны ва Украіне распаўсюджвалася праваенная прапаганда, маглі быць парушаныя правы дзяцей. У прыватнасці, гаворка ідзе пра тое, што відэа са школьнікамі нібыта выкарысталі без згоды іх бацькоў і перадалі трэцім асобам для стварэння фільма.

У сувязі з гэтым расійскі бок просіць праверыць, ці былі ў аўтараў усе неабходныя дазволы і ці адпавядае карціна этычным і прававым нормам.

Фільм знялі амерыканскі рэжысёр Дэвід Бранштэйн і былы расійскі настаўнік Павел Таланкін. Менавіта настаўнік на працягу некалькіх гадоў фіксаваў тое, што адбывалася ў школе: заняткі, мерапрыемствы і іншыя падзеі. Пазней ён выехаў з Расіі і перадаў гэтыя матэрыялы для стварэння фільма.

На ўручэнні «Оскара» аўтары адзначылі, што іх работа паказвае, як грамадства можа паступова страчваць сваю краіну праз маўчанне і згоду з тым, што адбываецца. Яны таксама заклікалі спыніць войны і задумацца пра адказнасць кожнага чалавека.

Акрамя «Оскара», фільм раней атрымаў і іншую міжнародную ўзнагароду як найлепшы дакументальны праект.

Каментары да артыкула