Нарвегія пабіла свой жа рэкорд па колькасці золата на зімовай Алімпіядзе
Зборная Нарвегіі ўжо заваявала 17 залатых медалёў на зімовых Алімпійскіх гульнях 2026 года ў Італіі. Чатыры гады таму, у 2022 годзе ў Пекіне, нарвежцы здабылі 16 медалёў вышэйшай пробы, і тады гэта таксама было найлепшым вынікам у гісторыі.
Нарвежская каманда на адкрыцці зімовых Алімпійскіх гульняў 2026 года. Фота: AP Photo/Misper Apawu
17‑е золата нарвежцам прынёс біятланіст Ёханэс Дале-Шэўдал, які выйграў мас-старт на 15 кіламетраў, апярэдзіўшы свайго земляка Стурлу Хольма Легрэйда і тытулаванага француза Кантэна Фіёна-Мае.
Акрамя біятлона, нарвежцы сталі найлепшымі ў лыжных гонках, фрыстайле, лыжным дваяборстве, скачках з трампліна і канькабежным спорце. Лыжнік Ёханэс Клеба заваяваў на гэтай Алімпіядзе ўжо пяць залатых медалёў, а ўсяго ў яго іх ужо 10 — абсалютны рэкорд «белых Алімпіяд».
Пры гэтым Алімпіяда яшчэ не скончылася, яе закрыццё запланавана на 22 лютага. І ў лыжнікаў-мужчын застаецца яшчэ адна не разыграная дыстанцыя — 50 кіламетраў.
Чытайце таксама:
ЗША абагналі Італію ў медальным заліку
Стурла Хольм Легрэйд выбачыўся перад былой дзяўчынай за аповед пра здраду
Ёханэс Клэба стаў дзевяціразовым алімпійскім чэмпіёнам і ўстанавіў рэкорд
Нарвежскі лыжнік Ёханэс Клэба стаў 10‑разовым алімпійскім чэмпіёнам