У Польшчы суд адмяніў рашэнне аб высылцы ў Літву былога палітвязня
У Польшчы суд адмяніў рашэнне аб высылцы ў Літву па Дублінскаму рэгламенту былога палітвязня Алеся Папковіча, паведамляе ініцыятыва «Партызанка».
Алесь Папковіч. Фота: «Байсол»
Ваяводскі адміністрацыйны суд у Варшаве палічыў, што ў справе былі сур’ёзныя працэдурныя парушэнні і што неабходна ўлічваць індывідуальную сітуацыю Папковіча. Паводле прадстаўнікоў ініцыятывы «Партызанка», гэта рашэнне можа дапамагчы іншым асобам, чые справы аўтаматычна закрываюцца без належнай ацэнкі асабістых абставін. Ініцыятыва плануе і далей сістэмна аспрэчваць падобныя рашэнні для ўстанаўлення справядлівай практыкі.
Алесь Папковіч быў затрыманы разам з братам Янам 2 верасня 2022 года перад запланаванай паездкай у Польшчу, падчас затрымання быў пабіты. У снежні 2022 года яму прысудзілі два гады калоніі, а на волю ён выйшаў у ліпені 2024 года. Міністэрства ўнутраных спраў Беларусі ўключыла яго ў спіс «экстрэмісцкіх асобаў».
Алесь быў эвакуяваны з Беларусі па літоўскай візе, баючыся новага затрымання пасля вызвалення. Усе яго блізкія знаходзяцца ў Польшчы. Паўтара месяца таму быў вызвалены і вывезены ў Польшчу ягоны брат Ян Папковіч, які выйшаў на волю разам з групай дэпартаваных ва Украіну 13 снежня.
Чытайце таксама:
Экс-палітзняволеная Наталля Падлеўская атрымала статус прасіцеля прытулку ў Літве
Былая палітзняволеная, дэпартаваная з Польшчы ў Літву, трапіла ў юрыдычныя абцугі
Маці Кацярыны Ваданосавай не вышлюць з Польшчы ў Літву — рашэнне суда