У Партугаліі падпалілі скульптуру Крышціяну Раналду
На партугальскім востраве Мадэйра невядомы мужчына падпаліў статую вядомага футбаліста Крышціяну Раналду, нападніка саудаўскага клуба «Аль-Наср» і зборнай Партугаліі па футболе. Інцыдэнт адбыўся на праспекце Авеніда-ду-Мар у горадзе Фуншал, паведамляе выданне Correio da Manhã.
Скрыншот з відэа
Акт вандалізму мужчына зняў на відэа і выклаў у сацыяльнай сетцы. На запісе бачна, як ён танчыць пад музыку, пасля чаго палівае статую лёгкаўзгаральнай вадкасцю і падпальвае яе.
Паліцыя Мадэйры паведаміла, што асоба парушальніка ўжо ўстаноўленая. Раней гэты чалавек ужо здзяйсняў падобныя супрацьпраўныя дзеянні.
Статуя Крышціяну Раналду да інцыдэнту. Фота: Getty Image
Крышціяну Раналду з’яўляецца чэмпіёнам Еўропы і двойчы перамагаў у Лізе нацый у складзе зборнай Партугаліі. Ён пяціразовы ўладальнік «Залатога мяча». Футбаліст нарадзіўся і вырас у Фуншале, а падпаленая статуя стаіць каля створанага на ягонай радзіме музея.
Чытайце таксама:
Мілеўскі: Самае складанае — жыць як Раналду. Мне ж трэба выпіць піва, выпіць віна
Крышціяну Раналду інвеставаў у заснаваны беларусам стартап
Крышціяну Раналду наведаў вячэру ў Белым доме разам з саудаўскім наследным прынцам
Крышціяну Раналду ўпершыню атрымаў чырвоную картку ў гульнях за Партугалію
Крышціяну Раналду стаў першым у гісторыі футбалістам-мільярдэрам