Памёр заснавальнік моднага дома Valentino
Італьянскі дызайнер і заснавальнік моднага дома Valentino Валянціна Гаравані памёр ва ўзросце 93 гадоў. Пра гэта паведаміў ягоны фонд у Instagram.
Валянціна Гаравані
Валянціна Гаравані пайшоў з жыцця 19 студзеня ў сваёй рэзідэнцыі ў Рыме, у атачэнні блізкіх людзей. Ягонае пахаванне адбудзецца 23 студзеня, а развітанне з легендарным мадэльерам пройдзе 21—22 студзеня.
Гаравані быў адным з самых уплывовых дызайнераў XX стагоддзя. Ён нарадзіўся 11 мая 1932 года ў горадзе Вогера на поўначы Італіі. Мастацтва моды вывучаў у Мілане, а пасля ў Парыжы, дзе вучыўся ў Школе выяўленчых мастацтваў (École des Beaux-Arts) і працаваў у атэлье Жана Дэса і Гі Лароша.
У 1960 годзе ён стварыў свой уласны модны дом Valentino ў Рыме, а сусветную славу атрымаў дзякуючы калекцыі 1962 года, паказанай у Фларэнцыі.
Адзенне Гаравані выбіралі такія знакамітасці, як Жаклін Кэнэдзі, Одры Хёпберн, Джэніфер Лопес, Джулія Робертс і іншыя.
Гаравані адкрыта прызнаваўся ў сваёй гомасэксуальнасці, а ягоным партнёрам быў італьянскі бізнэсмен Джанкарла Джамеці.
Чытайце таксама:
Памёр рэжысёр «Караля Льва» Роджэр Алерс
У Мазамбіку памерла вядомая ва ўсім свеце жанчына, якую называлі «дзіцём-цудам»