Прэзідэнт Балгарыі заявіў пра сваю адстаўку
Прэзідэнт Балгарыі Румен Радзеў заявіў падчас звароту да нацыі 19 студзеня, што падае ў адстаўку.
Румен Радзеў. Фота: AP Photo/Sergei Grits
Падчас выступу Румен Радзеў адзначыў, што гэта ягоны «апошні зварот у якасці прэзідэнта» Балгарыі. Ён выказаў намер падаць у адстаўку з пасады кіраўніка дзяржавы 20 студзеня, а таксама выказаў упэўненасць у тым, што віцэ-прэзідэнтка Іліяна Ётава стане годным выканаўцам абавязкаў прэзідэнта.
Румен Радзеў з'яўляецца прэзідэнтам Балгарыі з 22 студзеня 2017 года, у 2021‑м пераабраўся на другі тэрмін. Афіцыйна тэрмін ягоных паўнамоцтваў заканчваўся ў студзені 2027 года.
Адстаўку Радзева звязваюць з ягоным намерам стварыць уласную палітычную партыю пасля адстаўкі ў мінулым месяцы пад уплывам масавых пратэстаў урада краіны і на яе чале ўдзельнічаць у новых парламенцкіх выбарах. Паводле балгарскай канстытуцыі асноўныя ўладныя паўнамоцтвы належаць прэм'ер-міністру краіны, а ўлада прэзідэнта моцна абмежаваная.
Румен Радзеў належыць да ліку балгарскіх палітыкаў, якія займаюць пазіцыю, прыхільную да Расіі. Ён не раз адзначаўся выказваннямі, якія можна расцэньваць як прарасійскія.
Чытайце таксама:
Яшчэ адна краіна перайшла на еўра
У Балгарыі масавыя пратэсты. Урад пайшоў у адстаўку
Расія страчвае кантроль над Усходняй Еўропай — але размова не пра Беларусь