Пачынаецца чарговы рамонт на першым энергаблоку Беларускай АЭС
Міністэрства энергетыкі Беларусі паведаміла, што 15 студзеня першы энергаблок Беларускай атамнай электрастанцыі будзе выведзены ў чарговы, ужо чацвёрты па ліку, планава-папераджальны рамонт. Гэта частка штогадовай рамонтнай кампаніі, якая праводзіцца для падтрымання надзейнай і бяспечнай працы атамнай станцыі.
АЭС у Астраўцы. Фота з сацыяльных сетак
У ведамстве ўдакладнілі, што рамонт першага энергаблока пачнецца практычна адразу пасля таго, як другі энергаблок завершыць свой планавы рамонт, будзе падключаны да электрасеткі і выйдзе на намінальную магутнасць. Такім чынам, рамонты на двух энергаблоках праводзяцца па чарзе, без працяглых перапынкаў.
Адным з найважнейшых этапаў запланаваных работ стане перагрузка ядзернага паліва ў рэактары. Падчас гэтай працэдуры частку цеплавыдзяляльных зборак, якія ўжо адпрацавалі свой рэсурс, заменяць на новыя. Акрамя таго, спецыялісты правядуць маштабную дыягностыку і тэхнічнае абслугоўванне больш як дзесяці тысяч адзінак абсталявання і сістэм.
Праверкі закрануць рэактарнае і турбіннае абсталяванне, электратэхнічныя і вентыляцыйныя сістэмы, а таксама сродкі аўтаматыкі і кантролю. Асобная ўвага будзе нададзена эксплуатацыйнаму кантролю стану металу і зварных швоў.
У Міністэрстве энергетыкі падкрэслілі, што такія рамонты на кожным энергаблоку БелАЭС праводзяцца адзін раз на год. Іх мэта — забяспечыць стабільную працу станцыі і захаваць асноўныя тэхнічныя параметры абсталявання.
Пры гэтым адзначаецца, што планава-папераджальныя рамонты з’яўляюцца звычайнай міжнароднай практыкай для атамных электрастанцый, а іх працягласць можа вар’іравацца ў залежнасці ад складанасці і аб’ёму работ.
Паводле афіцыйных даных, за ўвесь час эксплуатацыі першы энергаблок Беларускай АЭС ужо выпрацаваў больш за 37 мільярдаў кілават-гадзін электраэнергіі.
Раней, 10 студзеня, Міністэрства энергетыкі паведаміла пра завяршэнне рамонту другога энергаблока і яго падключэнне да сеткі. Работы на ім доўжыліся 57 дзён. Папярэдні, трэці планава-папераджальны рамонт першага энергаблока праходзіў з пачатку снежня 2024 года да канца студзеня 2025‑га і заняў 55 дзён.
Чытайце таксама:
Над Астравецкай АЭС сёння назіралі каласальны слуп пары
Прынята рашэнне аб будаўніцтве трэцяга блоку на Беларускай АЭС
Сховішча для радыеактыўных адкідаў пабудуюць да 2030 года
У Беларусі амаль скончылі рабіць абгрунтаванне для будаўніцтва другой АЭС
Ёсць толькі 10 райцэнтраў, дзе насельніцтва вырасла нягледзячы ні на што. Лідар традыцыйны