Старэйшы сын Трампа дапусціў, што бацька можа пакінуць мірны працэс ва Украіне

Дональд Трамп-малодшы дапусціў, што прэзідэнт ЗША можа адысці ад украінскага мірнага працэсу, піша Sky News.

Дональд Трамп-малодшы. Фота: Julia Demaree Nikhinson / AP

Дональд Трамп-малодшы сцвярджае, што ўкраінскае пытанне не з'яўляецца прыярытэтам для амерыканцаў.

Сына Трампа спыталі, ці верыць ён, што прэзідэнт ЗША адыдзе ад Украіны.

«Я думаю, ён можа. Што добра ў маім бацьку і што ў ім унікальнага, дык гэта тое, што вы не ведаеце, што ён збіраецца рабіць. Ён непрадказальны», — адказаў Дональд Трамп-малодшы.

Праводзячы паралель з цяперашняй «вайной» свайго бацькі супраць наркакартэляў, Дональд Трамп-малодшы назваў банды, якія прывозяць нелегальныя наркотыкі ў Амерыку, «нашмат больш відавочнай і непасрэднай пагрозай для ЗША, чым усё, што [адбываецца] ва Украіне ці Расіі».

Хоць ён сказаў, што не верыць, што Украіна будзе «пакінутая», на яго думку ў амерыканскай грамадскасці няма прагі да бясконцых войнаў і далейшага фінансавання ваенных намаганняў Украіны.

Апісваючы Украіну як «куды больш карумпаваную краіну, чым Расія», ён ахарактарызаваў прэзідэнта Украіны Уладзіміра Зяленскага як «аднаго з найвялікшых маркетолагаў усіх часоў», які стаў «ледзь не бажаством, асабліва для левых».

Падыход бацькі да вайны ва Украіне ён апісаў як «здаровы сэнс».

Каментары да артыкула