Беларусаў эвакуявалі са Шры-Ланкі, дзе бушуе цыклон
Беларусы былі сярод выратаваных вайскоўцамі Індыі, што эвакуіравалі замежнікаў са Шры-Ланкі.
Фота: Indian Air Force
Ваенна-паветраныя сілы Індыі правялі аперацыю па эвакуацыі замежных грамадзян са Шры-Ланкі, якая моцна пацярпела ад трапічнага цыклону. Паводле паведамлення The Economic Times, сярод выратаваных ёсць і грамадзяне Беларусі.
Усяго індыйскія ВПС эвакуявалі 57 чалавек, уключна з 10 дзецьмі, а таксама цяжарнымі жанчынамі і цяжкапараненымі.
Шры-Ланка знаходзіцца ў стане надзвычайнай сітуацыі пасля таго, як трапічны цыклон «Дзітва» выклікаў беспрэцэдэнтныя паводкі і разбуральныя апоўзні па ўсёй краіне. На 3 снежня загінулых налічваецца больш за 400 чалавек, а колькасць зніклых без вестак перавышае тры сотні.