На аўкцыёне прадалі карціну Рубенса, якая некалькі стагоддзяў лічылася страчанай

У Францыі на аўкцыёне прадалі карціну знакамітага фламандскага мастака Пітэра Паўля Рубенса «Ісус Хрыстос на крыжы», якая лічылася страчанай больш за чатыры стагоддзі. Карціна 1613 года была выпадкова знойдзена аўкцыяністам Жанам-П’ерам Асенатам у адным парыжскім маёнтку перад яго продажам, паведамляе The Guardian.

Фота: The Guardian

Аўкцыённы дом меркаваў, што работа прынясе ад 1 да 2 мільёнаў еўра, але ў выніку яна была прададзена за 2,3 мільёна еўра. Асенат назваў карціну сапраўдным шэдэўрам, створаным Рубенсам у перыяд росквіту яго таленту. Ён адзначыў, што твор паказвае распятага Хрыста на фоне цёмнага, пагрозлівага неба — пачатак сапраўднага барока ў жывапісе.

Аўтэнтычнасць карціны пацвердзіў нямецкі даследчык Нільс Бютнер, адзін з вядучых спецыялістаў па фламандскім барока. Па яго словах, Рубенс часта звяртаўся да тэмы распяцця, але вельмі рэдка паказваў Хрыста ўжо мёртвым на крыжы. Гэтая ж работа ўнікальная тым, што на ёй бачныя кроў і вада, якія выцякаюць з раны на яго баку — падобную сцэну мастак намаляваў толькі раз.

Пра карціну «Ісус Хрыстос на крыжы» доўгі час было вядома мала: гісторыкі ведалі пра яе толькі дзякуючы гравюры аднаго з сучаснікаў Рубенса, хоць саму карціну ніхто не бачыў.

Пітэр Паўль Рубенс (1577-1640) — адзін з найвыбітнейшых мастакоў барока, аўтар каля трох тысяч твораў: алтарных кампазіцый, партрэтаў, пейзажаў і маштабных гістарычных карцін. Ён таксама займаўся дызайнам гравюр, шпалераў і архітэктурных праектаў, кіраваў вялікай майстэрняй у Антверпене і пакінуў велізарную мастацкую спадчыну.

Каментары да артыкула