У пераходных матчах згуляе «Смаргонь»
Сёння прайшлі шэсць матчаў заключнага 30‑га тура чэмпіянату Беларусі па футболе ў вышэйшай лізе.
Фота ФК «Смаргонь»
Чэмпіёнам у мінулым туры стаў дэбютант вышэйшай лігі «МЛ Віцебск», срэбра ў мінскага «Дынама» (яны сёння паміж сабой згулялі ўнічыю — 1:1), бронза ў мазырскай «Славіі».
Пакідаюць вышэйшы дывізіён «Маладзечна» і «Слуцк».
Сёння вызначалася, хто зойме 14‑е месца і згуляе ў пераходных матчах з «Белшынай», што фінішавала трэцяй у першай лізе. Прамыя пуцёўкі ў вышэйшую лігу заваявалі «Баранавічы» і магілёўскі «Дняпро».
На 14‑е месца «прэтэндавалі» «Смаргонь», «Нафтан» і «Віцебск».
«Нафтан» перамог дзяржынскі «Арсенал» 2:0, «Смаргонь» прайграла «Гомелю» 1:3, а «Віцебск» мазырскай «Славіі» 0:3.
Усе каманды набралі па 28 балаў, але за кошт асабістых сустрэч ніжэй аказалася «Смаргонь», якая і адпраўляецца ў стыкавыя матчы.
Заўтра будуць згуляныя дзве астатнія сустрэчы: БАТЭ — ФК «Мінск» і «Тарпеда-БелАЗ» — «Маладзечна».