Польшча атрымае ад ЕС 44 мільярды еўра на «Усходні шчыт»
Польшча стане галоўным карыстальнікам еўрапейскай праграмы SAFE — вялікага фінансавага інструмента, які прапануе вельмі танныя, амаль бясплатныя крэдыты на бяспеку і стратэгічнае развіццё. Паводле слоў прэм’ера Дональда Туска, гэты праект узнік у тым ліку дзякуючы польскай ініцыятыве падчас старшынства ў ЕС, паведамляе прэс-служба польскага ўрада.
Фота: AP Photo / Mindaugas Kulbis
Амаль 44 мільярды еўра Польшча зможа накіраваць на розныя патрэбы, у тым ліку:
- умацаванне «Усходняга шчыта» — абароннай інфраструктуры на ўсходняй мяжы;
- інвестыцыі ў дарожную і чыгуначную інфраструктуру, якая мае непасрэднае значэнне для нацыянальнай бяспекі;
- развіццё сучасных тэхналогій, у тым ліку касмічных праектаў, штучнага інтэлекту, кібербяспекі;
- закупку абсталявання і тэхнікі для войска, Памежнай службы і паліцыі.
Дональд Туск падкрэсліў, што Еўрапейскі саюз упершыню прызнаў, што ўсходняя мяжа Польшчы — гэта таксама агульная мяжа Еўропы, а таму яе абарона павінна фінансавацца на ўзроўні ЕС.
Акрамя таго, польскі прэм'ер паведаміў пра завяршэнне працэсу выбару пастаўшчыка новых падводных лодак для ВМС Польшчы. Пасля доўгіх гадоў чакання ўрад вызначыўся з партнёрам — найлепшай прызнаная прапанова Швецыі, якая адзіная цалкам адпавядала патрабаванням польскага флоту. Кантракт будзе ўключаць не толькі пастаўку трох сучасных падлодак, але і інвестыцыі ў польскія суднаверфі, каб рамонт і абслугоўванне адбываліся ўнутры краіны.
Гэта павінна істотна ўмацаваць пазіцыі Польшчы на Балтыцы.
Чытайце таксама:
Германія нарошчвае вайсковую моц і мяняе баланс сіл у Еўропе