На тэрыторыі былога кляштара картэзіянцаў у Бярозе хочуць зрабіць музей і гатэль
На тэрыторыі былога кляштара картэзіянцаў у Бярозе можа з’явіцца музейна-гатэльны комплекс. Гэтае пытанне аб абароне і далейшым выкарыстанні гістарычных руін абмеркавалі на пасяджэнні Бярозаўскага райвыканкама. Мэтай прапанаванай ініцыятывы з’яўляецца захаванне гістарычна-культурнай спадчыны, паведамляе sb.by.
Адноўленая брама кляштара картэзіянцаў. Фота: sb.by
Як паведаміў тэлеграм-канал райвыканкама, канцэпцыю прапанавала начальніца аддзела культуры Таццяна Кавалёк. Паводле гэтай канцэпцыі, у калідоры злева ад уязной брамы і ў кутняй вежы магла б размяшчацца музейная экспазіцыя.
У будынку, што прымыкае злева да палаца Сапегаў, прапануецца зрабіць канферэнц-залу для правядзення мерапрыемстваў, у тым ліку раённага балю адоранай моладзі. У палацы на першым паверсе можа быць рэстаран, а на другім — гатэль. У памяшканні справа ад палаца плануюць размясціць сувенірную краму і майстэрні.
Кляштар картэзіянцаў у Бярозе — вялікі рэлігійны комплекс у стылі барока з абарончымі элементамі, які з’яўляецца помнікам архітэктуры XVII стагоддзя. Ініцыятарам будаўніцтва быў Казімір Леў Сапега, а працягвалася яно з 1648 па 1689 год. Комплекс уключаў каменны касцёл, жылыя карпусы, бібліятэку, сталовую, бальніцу, аптэку, гаспадарчыя пабудовы, сад і вадаёмы. Усё было абнесена каменнымі сценамі з вежамі і капліцай, галоўным уваходам служыла масіўная брама з байніцамі.
Сёння ад кляштара засталіся толькі брама і руіны. Брама была адноўленая і стала сімвалам Бярозы, яе выяву нават змясцілі на гербе горада.