Офіс пра скандал з Ціханоўскім: Брытанская віза была аплачаная, але ён так і не падаўся на здачу адбіткаў пальцаў
Блогер і былы палітвязень Сяргей Ціханоўскі абурыўся, што не змог асабіста трапіць у Лондан, каб прысутнічаць на ўручэнні прэміі Магніцкага. Ён абвінаваціў у гэтым Офіс Ціханоўскай, які нібыта не папярэдзіў яго загадзя, праз што ён не паспеў зрабіць візу. У Офісе адказалі на папрок.
Фота: LookByMedia
Прэмію Магніцкага сёлета прысудзілі Святлане і Сяргею Ціханоўскім.
«Інфармацыя пра гэта сапраўды была апублікавана на мінулым тыдні, — каментуе Офіс Ціханоўскай. —
У нас была папярэдняя інфармацыя, што гэта можа адбыцца, і таму мы раілі Сяргею падацца на візу загадзя, дапамаглі яму запісацца два месяцы таму. Ён запоўніў дакументы, віза была аплачаная, але, на жаль, ён так і не падаўся на здачу біяметрыі, нягледзячы на нагадванні з нашага боку.
Мы з разуменнем ставімся да складанага графіку Сяргея, аднак у нас няма магчымасці паскорыць атрыманне брытанскай візы».