У Мінску жанчына прыйшла ў царкву і абакрала там старасту прыходу
У Мінску на разгляд у суд накіравалі крымінальную справу супраць 51‑гадовай жыхаркі сталіцы, якую абвінавачваюць у крадзяжы, паведамляе агенцтва «Мінск-Навіны».
Фота ілюстрацыйнае
Як паведамілі ў пракуратуры Фрунзенскага раёна, жанчына, знаходзячыся ў нецвярозым стане, праходзіла каля храма святой роўнаапостальнай Ніны на вуліцы Харкаўскай. З цікавасці яна зайшла ўсярэдзіну і заўважыла на лаўцы барсетку. З яе жанчына выняла кашалёк і выцягнула 525 рублёў і 60 даляраў, якія пазней патраціла.
Пацярпелым аказаўся стараста прыходу, які ў той вечар дапамагаў з рамонтам у храме. Пасля звароту ў міліцыю асобу злачынцы ўстанавілі дзякуючы камерам відэаназірання.
Высветлілася, што абвінавачаная нідзе не працуе і ўжо мела судзімасці — у тым ліку за крадзеж і нанясенне цяжкіх цялесных пашкоджанняў бацьку, што прывяло да яго смерці (судзімасць пагашаная).
Жанчыну абвінавачваюць у крадзяжы паводле арт. 205 Крымінальнага кодэкса. Яна цалкам прызнала віну, але шкоду не кампенсавала. Паводле заключэння экспертаў, абвінавачаная мае патрэбу ў прымусовым лячэнні ад хранічнага алкагалізму.
На час следства ёй абралі меру стрымання — падпіску аб нявыездзе і належных паводзінах.
Чытайце таксама:
У Беразіне нецвярозы мужчына скраў з царквы мошчы святога Спірыдона