У Брэсце паставілі скультуру дэсантніка з аўтаматам — у гонар арханёла Міхаіла
На алеі каваных ліхтароў на вуліцы Гогаля ў Брэсце з’явіўся новы арт-аб’ект — скульптура дэсантніка з аўтаматам. Аўтар работы, мясцовы скульптар Мікалай, назваў фігуру «Міша» — у гонар арханёла Міхаіла. Па яго словах, дэсантнік сімвалізуе нябеснага абаронцу ў сучасным вобразе і павінен ахоўваць горад, піша BGMedia.
Фота: brestcity.com
Скульптар расказаў, што фігура створаная паводле рэальных узораў вайсковай формы, а яе стварэнне заняло амаль год. Ідэя — паказаць сучаснага байца, які замяніў меч арханёла на зброю, але застаецца сімвалам міру і абароны.
Пасля ўстаноўкі скульптуры ў інтэрнэце разгарэлася дыскусія. Адныя гараджане падтрымалі ідэю, лічачы, што дэсантнік арганічна глядзіцца ў Брэсце, дзе ёсць свая часць ПДВ. Іншыя ж мяркуюць, што фігура з аўтаматам выглядае занадта агрэсіўна і не адпавядае атмасферы літаратурнай алеі, дзе большасць аб’ектаў прысвечаная героям з кніг і казак.
Крытыкі адзначаюць, што на вуліцы Гогаля варта размяшчаць мастацкія або літаратурныя вобразы, а не вайсковыя фігуры. У якасці альтэрнатывы яны прапануюць стварыць, напрыклад, скульптуру салдата з казкі Андэрсэна ці героя з народных аповедаў.
Алея каваных ліхтароў — адзін з самых вядомых турыстычных аб’ектаў у Брэсце. Яна адкрылася ў 2013 годзе, і кожны ліхтар там — асобная мастацкая гісторыя. З часам тут з’явіліся і іншыя аб’екты, не звязаныя з літаратурай, а дэсантнік стаў яшчэ адным прыкладам такіх работ.
Дарэчы, у Брэсце ўжо ёсць помнік, прысвечаны дэсантнікам. Ён быў усталяваны ў 2018 годзе ў гарадскім парку культуры і адпачынку і зроблены паводле сюжэту мультфільма «Дэсантнік Сцёпачкін». Там хлопчык частуе вайскоўца кашай, а цэнтрам кампазіцыі служыць парашут.
Фота: BGMedia
Чытайце таксама:
У цэнтры Брэста паставілі гіганцкі помнік гузіку
Знакаміты ліхтаршчык з Брэста паказаў свой «Масквіч-412», з якім не жадае расставацца