12 балаў за забітага расіяніна, 120 — за ўзятага ў палон. Як Украіна робіць вайну захапляльнай гульнёй

Каб павысіць матывацыю сваіх аператараў беспілотнікаў, Узброеныя Сілы Украіны ўкаранілі лічбавую сістэму ўзнагароджання, якая нагадвае прынцыпы відэагульняў. За паспяховыя місіі яны атрымліваюць спецыяльныя балы, якія потым можна абмяняць на новую зброю і абсталяванне ў спецыяльнай інтэрнэт-краме.

Украінскі вайсковец правярае абстаноўку з дапамогай беспілотніка ў непасрэднай блізкасці ад лініі фронту. Фота: AP / Libkos

Як расказаў першы віцэ-прэм'ер Міхаіл Фёдараў выданню The Guardian, «Сістэма бонусаў Арміі беспілотнікаў» была запушчана больш за год таму і першапачаткова была даступная толькі аператарам беспілотнікаў.

Па словах міністра, цяпер у гонцы за баламі ўдзельнічае каля 400 украінскіх падраздзяленняў беспілотнікаў. Яшчэ ў жніўні іх было толькі 95. Падраздзяленні, якія змагаліся за балы ў рамках сістэмы, у адным толькі верасні забілі або паранілі 18 000 расійскіх салдат.

За што прысуджаюцца балы?

Балы прысуджаюцца ў адпаведнасці з канкрэтнымі крытэрыямі, якія адлюстроўваюць важныя тактычныя мэты. Так за забойства расійскага пехацінца даецца 12 балаў, пашкоджанне танка — 20, забойства расійскага аператара дрона — 25, знішчэнне танка — 40, знішчэнне мабільнай ракетнай сістэмы — 50 балаў. Найбольшая колькасць балаў — 120 — налічваецца за расійскага салдата, узятага ў палон з дапамогай дрона.

Як адзначае выданне, колькасць ахвяр сярод расіян у верасні ўдвая перавысіла паказчык мінулага года, калі сістэма была толькі запушчана, што часткова звязана з тым, што Кіеў падвоіў узнагароду за забойства расійскага пехацінца з 6 да 12 балаў.

Заробленыя балы можна абмяняць на зброю ў інтэрнэт-краме Brave1, якую часам называюць «Amazon для вайны». У краме прадстаўлена больш за 100 розных дронаў, аўтаномных транспартных сродкаў і іншага матэрыялу. Таксама існуе рэйтынг лепшых каманд.

Пашырэнне сістэмы

Паводле слоў міністра лічбавай трансфармацыі, Украіна пашырае падыход «балы за знішчэнне» на артылерыйскія падраздзяленні, узнагароджваючы іх баламі за поспехі, якія можна выкарыстаць для набыцця новага ўзбраення. Лагістычныя групы пачалі зарабляць балы за выкарыстанне аўтаномных транспартных сродкаў замест людзей для забеспячэння перадавой.

Падраздзяленні разведкі атрымліваюць балы за тое, што яны называюць «Uber-навядзеннем» (па аналогіі з дадаткам для выкліку таксі).

«Вы, па сутнасці, скідаеце кропку на карце, як бы вы выклікалі таксі праз Uber, але замест таксі дрон з іншага падраздзялення трапляе ў цэль», — тлумачыць Фёдараў.

Фёдараў таксама паведаміў, што ў сістэму балаў уключана ўзнагароджанне за выкарыстанне дронаў, якія часткова кіруюцца штучным інтэлектам (ШІ). ШІ дапамагае аператарам выбіраць цэлі і кантралюе апошнія моманты палёту дрона, што значна павышае дакладнасць удару.

Камандзіры падраздзяленняў па-рознаму ацэньваюць уплыў сістэмы.

Юрый Федарэнка, камандзір палка дронаў «Ахіл», адзначыў, што, нягледзячы на гейміфікацыю, часам даводзіцца выконваць задачы, якія прыносяць нізкую колькасць балаў, калі гэта неабходна для дасягнення кароткатэрміновай баявой мэты.

«У першую чаргу мы павінны выконваць пастаўленую задачу, таму што гэта вайна», — цытуе выданне словы Федарэнкі.

У той жа час камандзір падраздзялення «Фенікс» Андрэй Палтарацкі адзначыў моцную канкурэнцыю, якая ўзнікла ў выніку сістэмы:

«Спаборнічае ўсё падраздзяленне. Аператары дронаў спаборнічаюць паміж сабой, нават вышэйшыя камандзіры змагаюцца за першынство». Аднак ён падкрэсліў, што калі Расія пачынае наступальныя аперацыі, то канкурэнцыя спыняецца, і «ўсе працуюць разам».

Матэматыка вайны і маральны бок

Фёдараў падкрэсліў, што сістэма балаў дазваляе непасрэдна ўплываць на рэалізацыю тактыкі Кіева. Напрыклад, высокая колькасць балаў за захоп ваеннапалоннага адлюстроўвае патрэбу Украіны ў абменным фондзе.

Украінскія вайскоўцы аналізуюць відэа ад беспілотнікаў. Фота: AP Photo / Libkos

Па словах Фёдарава, сістэма «балы за забойствы» дала Украіне значную колькасць даных, што азначае, што яна «лепш разумее матэматыку вайны»

«Дзякуючы гэтым балам мы пачынаем лепш разумець, што адбываецца на полі бою», — адзначае Фёдараў і тлумачыць: каб атрымаць балы, аператар павінен прадставіць відэадоказы і апісанне місіі. Гэта дапамагае аналізаваць поспех аперацый.

«Мы бачым, што больш эфектыўна, а што менш эфектыўна. Усе бачаць табліцу лідараў, таму падраздзяленні пачынаюць звяртацца адно да аднаго, каб вучыцца ўзаемна», — даводзіць міністр.

На пытанне аб маральным баку ўстанаўлення «цаны» за чалавечыя жыцці, Фёдараў адказаў, што падыход да гэтага стаў «даволі безасабовым». Рашэнне аб колькасці балаў прымаецца ўрадам Украіны.

«Мы ваюем чацвёрты год запар, і гэта цяжка. Мы проста шукаем спосабы дзейнічаць больш эфектыўна і разглядаем гэта як частку нашай штодзённай працы. У пагоні за баламі і пры іх вызначэнні амаль няма эмацыйных рэфлексій. Гэта ўспрымаецца як чыста тэхнічная праца», — заявіў міністр.

«Калі вы не спыніце ворага, ён заб'е вашых салдат, а пасля таго, як салдаты загінуць, ён прыйдзе ў горад і заваюе, знішчыць і заб'е мірных жыхароў», — дадае Фёдараў.

Каментары да артыкула